ⴰⵙⵉⵡⴹ ⴰⵙⵏⵖⵎⴰⵙ ⵏ ⵓⴳⵔⴰⵡ ⵏ ⵓⵎⴰⵔⵉⵙ ⴰⵙⵔⵜⴰⵏ ⵏ ⵓⴽⴰⴱⴰⵕ ⵏ ⵓⴼⴰⵔⴰ ⴷ ⵜⵏⵎⵍⴰ ⵏ ⵡⴰⵙⵙ ⵏ ⵓⵙⵉⵏⴰⵙ 31 ⵉⵏⵏⴰⵢⵔ 2023

ⵉⴳⴳ ⵓⵎⴰⵔⵉⵙ ⴰⵙⵔⵜⴰⵏ ⵏ ⵓⴽⴰⴱⴰⵕ ⵏ ⵓⴼⴰⵔⴰ ⴷ ⵜⵏⵎⵍⴰ ⴰⴳⵔⴰⵡ ⵏⵏⵙ ⴰⵣⵎⵣⴰⵏ ⴰⵙⵙ ⵏ ⵓⵙⵉⵏⴰⵙ 31 ⵉⵏⵏⴰⵢⵔ 2023, ⵉⵙⵉⵡⵍ ⵅⴼ ⵜⵓⴳⵜ ⵏ ⵜⵎⵙⴰⵔⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ, ⵎⴽⵍⵍⵉ ⵉⵙⵉⵡⵍ ⵅⴼ ⵉⵙⵏⵜⴰⵍ ⵣⴷⵉⵏⵉⵏ ⴷ ⵜⵓⴷⵔⵜ ⵜⴰⴳⵯⵏⵙⴰⵏⵜ ⵏ ⵓⴽⴰⴱⴰⵕ.

ⵜⴰⴳⵯⵉⵜ ⵉⴷⵓⵙⵏ ⵉ ⵓⵎⵏⴰⴷ ⵏ ⵓⴱⵕⵍⴰⵎⴰⵏ ⴰⵡⵕⵓⴱⴱⵉ ⵎⵏⵉⴷ ⵏ ⵜⵎⴰⵣⵉⵔⵜ ⵏⵏⵖ

ⴳ ⵓⵎⵣⵡⴰⵔⵓ, ⵉⵙⵎⴰⵢⵏⵓ ⵓⵎⴰⵔⵉⵙ ⴰⵙⵔⵜⴰⵏ ⵜⴰⴳⵯⵉⵜ ⵏⵏⵙ ⵉⴷⵓⵙⵏ ⵏ ⵓⴽⵛⵛⵓⵎ ⵓⴱⵕⵍⴰⵎⴰⵏ ⴰⵡⵕⵓⴱⴱⵉ ⴳ ⵉⵙⴽⴽⵉⵏⵏ ⵉⴳⵯⵏⵙⴰⵏⵏ ⵏ ⵜⵎⴰⵣⵉⵔⵜ ⵏⵏⵖ, ⵉⴷⴷⵖ ⴰⵎⴰⵏⴰⴷ ⴷⴰ ⵉⴳⴳ ⴳ ⵓⵎⴳⴳⴰⵔⵓ, ⵍⵍⵉⴳ ⵜ ⵙⵎⴰⵙⵙⵏⵜ ⵜⵙⴳⴳⵉⵡⵉⵏ ⴷⴰ ⵜⵣⵣⵉⵡⵣ ⵜⵉⵍⴰⵍⵜ ⵢⴰⵜⵜⵓⵢⵏ ⵏ ⵍⵎⵖⵔⴱⵉ ⴳ ⵉⵙⵡⵉⵔⵏ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ ⴷ ⵓⵙⵎⵢⴰⵏⴰⵡ ⴰⵏⴳⵎⵓ ⴷ ⵓⵏⵉⵎⴰⵏ ⵏ ⵉⵣⴷⴷⵓⵢⵏ ⵏⵏⵙ ⴷ ⵜⵎⴷⵔⴰⵡⵉⵏ ⵏⵏⵙ, ⴷⴰⵜ ⵏⵏⵙ ⵉⴼⵔⴷⵉⵙⵏ ⵉⵙⵏⴳⴰ ⵉ ⵍⵎⵖⵔⵉⴱ, ⴹⴼⵢⵕⵏ ⵉⵙⴳⵣⴰⵍⵏ ⵏⵏⵙ ⵉⴼⵔⴷⵉⵙⵏ ⵢⴰⴹⵏ ⴳ ⵓⴱⵕⵍⴰⵎⴰⵏ ⴰⵡⵕⵓⴱⴱⵉ.

ⴷ ⴰⵔ ⵉⵜⵜⵙⴷⴷⵉⴷ ⵓⴽⴰⴱⴰⵕ ⵏ ⵓⴼⴰⵔⴰ ⴷ ⵜⵏⵎⵍⴰ ⵎⴰⵙ ⴷ ⴰⴱⵕⵍⴰⵎⴰⵏ ⴰⵡⵕⵓⴱⴱⵉ ⵙ ⵜⵙⵓⵔⵉⴼⵜ ⵏⵏⵙ ⵜⵓⵣⴷⵉⵔⵜ ⵎⵏⵉⴷ ⵏ ⵍⵎⵖⵔⵉⴱ, ⵜⵡⴰⵜⵜⵙ ⵢⴰⵏ ⵓⵎⴷⵔⴰⵡ ⴰⴷⵓⵙⴰⵏ ⴷ ⵓⵎⴰⵍⴰⵡ ⵉⴳⴰⵏ ⴰⵎⵏⵍⵍⵉ, ⵉⵜⵜⴰⵏⵏⴰⵢⵏ ⴰⵙⴰⴽⴰ ⵏⵏⵙ ⴰⴷⵉⵎⵓⵇⵔⴰⵜⵉ ⴷ ⵓⵣⵔⴼⴰⵏ ⴰⵎⵥⵍⴰⵢ ⵢⴰⵜⵜⵓⵢⵏ ⴳ ⵓⵙⵓⵜⵍ ⵏⵏⵙ ⴰⵙⴳⴰⵡⴰⵏ ⴷ ⵓⵎⵏⵥⴰⵡ, ⵉⵍⵉⵏⵜ ⵖⵓⵔⵙ ⵜⵉⵍⴰⵍ ⵜⵓⵛⵛⵉⵍⵉⵏ ⴳ ⵓⵙⴷⵉⵙ ⵏ ⵜⴼⴰⴷⴷⵉⵡⵉⵏ ⵏ ⵓⵣⴳⴳⵓ ⴷ ⵓⴼⵔⴰ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ.

ⴳ ⵓⵎⵏⴰⴹ ⴰⴷ, ⴷⴰ ⵉⵙⵎⴰⵢⵏⵓ ⵓⴽⴰⴱⴰⵕ ⵏ ⵓⴼⴰⵔⴰ ⴷ ⵜⵏⵎⵍⴰ ⴰⵙⴷⴷⵉⴷ ⵏⵏⵙ ⵎⴰⵙ ⵉⴼⵔⴷⵉⵙⵏ ⴰⴽⴽⵯ ⵏ ⵓⴳⴷⵓⴷ ⴰⵎⵖⵔⵉⴱⵉ ⴷ ⵜⵣⵎⵎⴰⵔ ⵏⵏⵙ ⵜⵉⵎⴰⴷⴷⴰⵔⵉⵏ ⴷ ⵜⵎⵔⵙⴰⵍⵉⵏ, ⵓⵔ ⵙⵖⴰⵡⵙⴰⵏ ⵙ ⵎⴰⴷ ⵉⵜⵜⴳⴰⵏ ⴰⵎⴰⵔⵉ ⵏⵏⵙⵏ ⴳ ⵓⴹⴼⴼⵓⵕ ⵏ ⵓⵙⴰⴽⴰ ⴰⵏⴳⵎⵓ ⴷ ⵓⴷⵉⵎⵓⵇⵔⴰⵜⵉ ⴷ ⵓⵣⵔⴼⴰⵏ ⴰⵏⴰⵎⵓⵔ, ⵙ ⵜⵡⵉⵍⴰ ⵜⵉⵍⴻⵍⵍⵉⵜ, ⴰⵙⴰⴽⴰ ⴰⴷ, ⵎⴽⵍⵍⵉ ⵅⴼ ⴱⴷⴷⴰ ⵉⵜⵜⵙⴷⴷⵉⴷ ⵓⴽⴰⴱⴰⵕ ⵏ ⵓⴼⴰⵔⴰ ⴷ ⵜⵏⵎⵍⴰ, ⵎⴽⵍⵍⵉ ⵢⵓⴽⵍⴰⵍ ⴰⴷ ⵏⴱⵓⵔⵣ ⵙ ⵓⵎⵄⵉⵏⵏ ⵏⵏⵙ ⵉⵎⵇⵇⵔⴰⵏⵏ, ⵎⴽⵍⵍⵉ ⵙⵖⴰⵡⵙⴰⵏ ⵉⵍⵎⴰⴹⵏ ⵏⵏⵙ ⴰⴹⴼⴼⵓⵕ ⵏ ⵜⵖⵙⴰ ⵃⵎⴰ ⴰⴷ ⵢⵉⵍⵉ ⵓⵙⵙⵓⵔⴼ ⵏⵏⵙⵏⵜ. ⵜⴰⵎⵔⴰⵔⵓⵜ ⵉⵥⵉⵍⵏ ⵅⴼ ⵉⵏⴰⵥⴰⵕⵏ ⴰⴽⴽⵯ ⵜⴻⵜⵜⵍⵎⴰⵡⴰⵢ ⵜⵎⴰⵣⵉⵔⵜ ⵏⵏⵖ, ⴷ ⴰⵙⴷⵓⵙ ⵏ ⵉⵏⵉⵔ ⴰⴳⵯⵏⵙⴰⵏ, ⵙ ⵓⵙⴷⵓⵙ ⵏ ⵜⵣⵎⵎⴰⵔ ⵏⵏⵖ ⵜⵉⴷⵎⵙⴰⵏⵉⵏ ⵜⵉⵏⴰⵎⵓⵔⵉⵏ, ⴷ ⵓⵙⵖⵜⵙ ⵏ ⵜⵣⵔⴼⵜ ⵜⴰⵏⴰⵎⵓⵏⵜ, ⴷ ⵓⵣⵓⵣⵣⵔ ⵏ ⵢⵉⵎⴰⵏ ⴰⴷⵉⵎⵓⵇⵔⴰⵜⵉ ⴰⴷⵓⵙⴰⵏ ⴳ ⵜⵓⴷⵔⵜ ⵜⴰⵎⴰⵜⴰⵢⵜ, ⴷ ⵓⵙⵉⵔⵉⵡ ⵏ ⵓⵙⴰⵢⵔⵓⵔ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ, ⴰⴽⴷ ⴰⵙⵣⴷⴳ ⵏ ⵉⵏⵣⵡⵉⵜⵏ ⴷ ⵓⵔⵣⵣⵓ ⵏ ⵜⵎⴰⵎⴽⵜ ⴷ ⵉⵎⵙⴰⵙⴰⵏ ⵉ ⵉⵙⴷⴰⵡⵏ ⵍⵍⴰⵏⵉⵏ, ⵉⴳ ⵉⵜ ⵡⵉⴷ ⵉⵣⴷⵉⵏ ⴷ ⵜⵏⵖⵎⴰⵙⵜ ⵏⵉⵖ ⵉⵎⵓⵙⵙⵓⵜⵏ ⵉⵏⴰⵎⵓⵏⵏ.

ⴰⵙⴰⵜⵜⵓⵢ ⵏ ⵓⴼⵓⵍ ⴰⵚⵀⵢⵓⵏ ⵏ ⵉⴱⴽⴽⴰⴹⵏ ⵏⵏⵙ ⵎⴳⴰⵍ ⵏ ⵓⴳⴷⵓⴷ ⴰⴼⵉⵍⵉⵟⵉⵏⵉ ⴰⵙⴷⵓⵙ ⵏ ⵓⴼⵔⵉⵙ ⵏⵏⵙ ⴰⵖⵡⵡⴰⵖ

ⴳ ⵜⵙⴳⴰ ⵢⴰⴹⵏ, ⵉⵙⵉⵡⵍ ⵓⵎⴰⵔⵉⵙ ⴰⵙⵔⵜⴰⵏ ⵅⴼ ⵜⵎⵔⵏⵉⵡⵉⵏ ⵙⴰⵔⵏⵉⵏ ⴳ ⵜⵎⵙⴰⵔⵜ ⵜⴰⴼⵉⵍⵉⵚⵟⵉⵏⵉⵜ.  ⵉⵙⵙⵅⵛⵏ ⴱⴰⵀⵔⴰ ⴰⵙⴰⵜⵜⵓⵢ ⴰⵀⴰⵎⴰⵊⵉ ⵉⵎⵉⵣⵉ ⴷⴰ ⵜⴻⵜⵜⴳⴳ ⵜⵣⵎⵔⵜ ⵏ ⵓⵎⴷⴷⵓⵔⵓⵢ ⴰⵚⵀⵢⵓⵏ ⵎⴳⴰⵍ ⵏ ⵓⴳⴷⵓⴷ ⴰⴼⵉⵍⵉⵚⵟⵉⵏⵉ ⴰⵏⵣⴱⴰⵢ ⴳ ⵉⴽⴰⵍⵉⵡⵉⵏ ⵏ ⴼⵉⵍⵉⵚⵟⵉⵏ. ⵙ ⵓⵢⴰ, ⴷⴰ ⵉⵙⵎⴰⵢⵏⵓ ⵓⴽⴰⴱⴰⵕ ⵏ ⵓⴼⴰⵔⴰ ⴷ ⵜⵏⵎⵍⴰ ⴰⵙⵅⵛⵏ ⵏⵏⵙ ⴰⴷⵓⵙⴰⵏ ⵉ ⵜⵙⵔⵜⵉⵜ ⵏ ⵓⵙⴷⵓⵔⵔⵉ, ⴷ ⵜⵏⵖⵉ ⴷ ⵓⵙⵏⵏⵙⵜⵎ ⴷ ⵓⵙⵣⵡⴰⴳ ⴷ ⵡⴰⵎⵎⴰⵥ ⴷ ⵓⵙⵔⴼⵓⴼⵏ, ⴷⴰ ⵜⴻⵜⵜⴳ ⵜⵏⴱⴰⴹⵜ ⵏⵉⵙⵔⴰⵢⵉⵍ, ⵙ ⵜⵡⵉⵍⴰ ⵏ ⵓⴱⴽⴽⴰⴹ ⴷ ⵓⵙⵏⵓⵃⵢⵓ ⵢⵓⵏⵜⵏ ⵙ ⵉⵥⵓⵕⴰⵏ ⴳ ⴳⴰⵔ ⴷ ⵜⵖⵡⵡⴰⵖⵜ, ⵉⴼⴼⵖⵏ ⵉ ⵜⵎⵢⴰⵇⵇⴰⵏⵉⵏ ⴰⴽⴽⵯ ⴷ ⵉⵙⵖⵡⴰⵏ.

ⵙ ⵎⴽⵍⵍⵉ ⵙ ⵉⵜⵜⵙⴷⴷⵉⴷ ⵓⴽⴰⴱⴰⵕ ⵏ ⵓⴼⴰⵔⴰ ⴷ ⵜⵏⵎⵍⴰ ⵅⴼ ⵡⴰⵏⵏⴰⵍ ⵏⵏⵙ ⵢⵓⵖⴷⵏ ⵉ ⵜⵎⵙⴰⵔⵜ ⵜⴰⴼⵉⵍⵉⵚⵟⵉⵏⵉⵜ, ⴷⴰ ⵉⵜⵜⴰⵏⵏⴰⵢ ⵎⴰⵙ ⵓⵔ ⵉⵍⵍⵉ ⴽⵔⴰ ⵏ ⵓⵎⴽⴽⵉⵙⵉ ⵉ ⵓⵙⵔⵔⴰⵣ ⵉ ⵓⴳⴷⵓⴷ ⴰⴼⵉⵍⵉⵚⵟⵉⵏⵉ ⵙⴳ ⵉⵣⵔⴼⴰⵏ ⵏⵏⵙ ⵉⵏⴰⵎⵓⵔⵏ ⵜⵉⵎⵏⵍⵍⵉⵜⵉⵏ, ⴳ ⵓⵎⵣⵡⴰⵔⵓ ⵏⵏⵙⵏ ⴰⵣⵔⴼ ⴳ ⵜⵓⵚⴽⴰ ⵏ ⵓⵡⴰⵏⴽ ⵏ ⴼⵉⵍⵉⵚⵟⵉⵏ ⵜⴰⵏⵉⵎⴰⵏⵜ ⵜⴰⵎⴰⵥⵓⵏⵜ ⵏⵏⵙ ⵍⵇⵓⴷⵙ. ⴷ ⴳ ⵓⵙⴰⵜⵉ ⴰⴷ, ⴷⴰ ⵉⵙⵎⴰⵢⵏⵓ ⵓⴽⴰⴱⴰⵕ ⵏ ⵓⴼⴰⵔⴰ ⴷ ⵜⵏⵎⵍⴰ ⴰⵖⵓⵔⵉ ⵏⵏⵙ ⵉ ⵜⵣⵎⵎⴰⵔ ⴰⴽⴽⵯ ⴷ ⵉⴼⵔⴷⵉⵙⵏ ⴰⴽⴽⵯ ⵏ ⴼⵉⵍⵉⵚⵟⵉⵏ ⴰⴷ ⴳⵏ ⵢⴰⵏ ⵙⵔⵙⵏ ⴳ ⵜⵙⴳⴰ ⵉⵎⵣⴰⵔⴰⵢⵏ ⵏⵏⵙⵏ ⵉⵙⵉⵏⴰⵏⵏ, ⵙⵍⴰⵡⴰⵏ ⴰⴽⴽⵯ ⴷⴷⴰⵡ ⵏ ⵓⵎⵔⴰⵔⴰ ⵏ ⵡⴰⵎⵓⵏ ⴰⴳⵔⴰⵖⵍⴰⵏ ⴰⴽⴷ ⵜⵎⵙⴰⵔⵜ ⵜⴰⴼⵉⵍⵉⵚⵟⵉⵏⵉⵜ ⵙ ⵢⴰⵏ ⵉⴼⵙⵙⵉ ⴷ ⵜⴱⵔⵉⴷⵜ ⴷ ⵉⵙⴱⴷⴰⴷⵏ ⵓⵔ ⴼⴰⵡⵏⵉⵏ.

ⵎⴽⵍⵍⵉ ⵉⵥⵕⵕⴰ ⵓⴽⴰⴱⴰⵕ ⵏ ⵓⴼⴰⵔⴰ ⴷ ⵜⵏⵎⵍⴰ  ⵎⴰⵙ ⴷ ⵜⵉⵎⵔⵏⵉⵡⵉⵏ ⵜⵉⵎⴳⴳⵓⵔⴰ ⴷⴰ ⵜⵜⵙⴷⴷⵉⴷⵏⵜ ⵉ ⵓⵎⴰⴹⴰⵍ, ⵙ ⵜⴱⵔⵉⴷⵜ ⴳ ⵓⵔ ⵜⵍⵍⵉ ⵜⵓⵔⴷⴰ, ⵜⴰⵜⵜⵓⵢⵜ ⵏ ⵓⴼⵓⵍ ⴰⵚⵀⵢⵓⵏ ⴳ ⵓⵙⴷⵓⵙ ⵏ ⵓⴼⵔⵉⵙ ⵏⵏⵙ ⴰⵖⵡⵡⴰⵖ, ⵎⵇⵇⴰⵔ ⴷ ⵉⵙⵓⵔⵉⴼⵏ ⵏ ⵓⵏⵏⵓⵕⵥⵎ ⴷⴰ ⴳⴳⵏⵜ ⵜⵓⴳⵜ ⵏ ⵜⵎⵉⵣⴰⵔ ⵎⵏⵉⴷ ⵏ ⵉⵙⵔⴰⵢⵉⵍ, ⴰⴼⴰⴷ ⴰⴷ ⵜⴳ ⵜⵎⴳⴳⴰⵔⵓⵜ ⴰⴷ ⵢⴰⵏ ⵓⵡⴰⵏⴽ ⵉⵜⵜⵓⵇⵇⴰⵔⵏ ⴰⵙⵍⴳⵏ ⴰⴳⵔⴰⵖⵍⴰⵏ ⵜⴳⴳ ⵢⴰⵜ ⵜⵎⵢⴰⴷⴰⵙⵜ ⵜⴰⵙⵔⵜⴰⵏⵜ ⵉⵥⵉⵍⵏ ⴷⴰ ⵢⴰⴽⴽⴰⵏ ⵉⵣⵔⴼⴰⵏ ⴰⴽⴽⵯ ⵉⵏⴰⵎⵓⵔⵏ ⵓⵣⵔⵉⴼⵏ ⵉ ⵓⴳⴷⵓⴷ ⴰⴼⵉⵍⵉⵚⵟⵉⵏⵏ; ⵉⴳ ⵜⴰⴱⵔⵉⴷⵜ ⵜⴰⵎⵢⵉⵡⵏⵜ ⵏ ⵓⵙⵖⵜⵙ ⵏ ⵓⴼⵔⴰ ⴷ ⵜⵓⵚⴽⴰ ⵏ ⵉⵣⴷⴷⵓⵢⵏ ⵎⵙⴰⵙⴰⵏⵉⵏ ⵏⴳⵔ ⵉⵙⵔⴰⵢⵉⵍ ⴷ ⵉⵡⴰⵏⴽⵏ ⴰⴽⴽⵯ ⵏ ⵡⴰⵏⵙⴰ.

ⵜⴰⵙⵓⵍⵜ ⵏ ⵜⴰⵜⵜⵓⵢⵜ ⵏ ⵡⴰⵜⵉⴳⴳⵏ ⴷⴷⴰⵡ ⵏ ⵜⴳⴳⵓⵎⵔⴰ ⵏ ⵜⵎⴳⴳⵉⵢⵉⵏ ⵜⵓⵏⴱⵉⴹⵉⵏ

ⵉⵙⴰⵡⵍ ⵓⵎⴰⵔⵉⵙ ⴰⵙⵔⵜⴰⵏ, ⴰⵡⴷ ⵅⴼ ⵜⵙⵓⵍⵜ ⵏ ⵜⴰⵜⵜⵓⵢⵜ ⵜⴰⵎⵇⵇⵔⴰⵏⵜ ⵏ ⵡⴰⵜⵉⴳⴳⵏ ⵏ ⵜⵓⴳⵜ ⵏ ⵜⵖⴰⵡⵙⵉⵡⵉⵏ ⵜⵉⴷⵙⵍⴰⵏⵉⵏ. ⴷ ⵉⵙⵎⴰⵢⵏⵓ ⵜⵓⵜⵜⵔⴰ ⵏⵏⵙ ⵉ ⵜⵏⴱⴰⴹⵜ ⵃⵎⴰ ⴰⴷ ⵜⴳⴳ ⵉⵙⵡⵓⴷⴷⵓⵜⵏ ⴷ ⵜⵖⵜⴰⵙⵉⵏ ⴷ ⵓⵙⴰⵏⵉⵏ ⵏⵏⴰ ⵉⵣⵎⵔⵏ ⴰⴷ ⵙⵉⴼⵙⵓⵙⵏⵜ ⵜⴰⵙⵙⴰⵙⵜ ⵅⴼ ⵉⵎⵖⵔⵉⴱⵉⵢⵏ, ⴼⵔⴳⵏⵜ ⴰⵙⵡⵉⵔ ⵏ ⵜⵓⴷⵔⵜ ⵏⵏⵙⵏ, ⵏⵏⴰⵍⵏⵜ ⵜⴰⵣⵎⵔⵜ ⵏⵏⵙⵏ ⵜⴰⵎⵙⵖⵉⵡⵜ. ⵎⴽⵍⵍⵉ ⴰⵙ ⵉⵜⵜⵔ ⴰⴷ ⵓⵔ ⵜⴰⵎⵥ ⵖⴰⵙ ⴳ ⵜⵎⴳⴳⵉⵢⵉⵏ ⵜⵉⵎⵥⵍⴰⵢⵉⵏ ⵏⵏⴰ ⵎⵉ ⵉⴷⵔⵓⵙ ⵉⴹⵉⵚ ⵏⵏⵙⵏⵜ, ⵜⵙⵙⵓⵔⴼ ⵉ ⵜⵎⵥⵍⴰ ⵏ ⵜⵏⴽⴷⴰ ⵏ ⵜⵎⵛⵓⵛⵛⴰⴹ  ⵉⵣⴷⵉⵏ ⴷ ⵡⴰⴷⴷⴰⴷⵏ ⵉⴳⵔⴰⵖⵍⴰⵏⵏ.

ⴰⵙⵖⵏⵓ ⵏ ⵓⵙⵍⴳⵏ ⵉⵥⵍⵉⵏ ⵙ ⵜⵎⵙⵙⵓⵔⵉⵏ ⵜⵉⵏⵎⵏⴰⴹⵉⵏ ⵎⵓ ⵎⵏⵏⴰⵡⵜ ⵜⵏⵓⴼⴰ: ⵜⴰⵖⴹⴼⵜ ⵙⴳ ⵓⵙⵙⵉⵏⴼ ⵏ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ

ⴳ ⵜⵙⴳⴰ ⵢⴰⴹⵏ, ⵉⵙⴰⵡⵍ ⵓⵎⴰⵔⵉⵙ ⴰⵙⵔⵜⴰⵏ, ⴳ ⵓⵎⵣⵡⴰⵔⵓ, ⵅⴼ ⵓⵙⵍⴳⵏ ⵉⵥⵍⵉⵏ ⵙ ⵜⵎⵙⵙⵓⵔⵉⵏ ⵜⵉⵏⵎⵏⴰⴹⵉⵏ ⵎⵓ ⵎⵏⵏⴰⵡⵜ ⵜⵏⵓⴼⴰ, ⵏⵏⴰ ⵅⴼ ⴷ ⵉⵎⵙⴰⵙⴰ ⵓⵙⵇⵇⵉⵎ ⵏ ⵜⵏⴱⴰⴹⵜ ⴳ ⵡⵓⵙⵙⴰⵏ ⵉⵎⴳⴳⵓⵔⴰ. ⵉⵙⵙⵏⴽⴷ ⴰⵎⵏⵓⵙ ⵏⵏⵙ ⴷ ⵜⵖⴹⴼⵜ ⵏⵏⵙ ⵅⴼ ⵉⴳⴳⵉⵜ ⵏ ⵓⵎⴰⵍⴰⴷ ⵉ ⵜⵏⵓⴼⴰ ⵏ ⵓⴱⴹⴹⵓ ⵏ ⵡⴰⵎⴰⵏ ⵏ ⵜⵉⵙⵙⵉ ⴷ ⵓⵥⴰⵕⵓⵕ ⴷ ⵓⵙⵣⴷⴳ ⵏ ⵓⴱⵍⵓⵍⵓ, ⵉⴷⴷⵖ ⴳⴰⵏⵜ ⵜⵉⵏⵓⴼⴰ ⵜⵉⴳⴷⵓⴷⴰⵏⵉⵏ ⵜⵉⵎⴰⴷⴷⴰⵔⵉⵏ ⴷ ⵜⵙⵜⵔⴰⵜⵉⵊⵉⵜⵉⵏ, ⵎⴽⵍⵍⵉ ⵉⵜⵜⵔ ⵉ ⵜⵏⴱⴰⴹⵜ ⴰⴷ ⵜⴻⵜⵜⵏⵢⴰⵍⴽⴰⵎ ⴷ ⵓⵎⵏⴰⴷ ⴰⵎⴰⵜⴰⵢ, ⴰⴼⴰⴷ ⴰⴷ ⴰⵙ ⵜⵙⵙⴼⵔⵓ ⵉⵙⴱⴷⴰⴷⵏ ⴷ ⵜⵓⵎⴰⵢⵉⵏ ⴷ ⵉⵙⵡⴰⵍⴰⵜⵏ ⵏ ⵓⵙⵖⵏⵓ ⴰⴷ ⵏⵏⴰ ⴷ ⵉⵎⵓⵏ ⵙⴳ ⵓⵙⵙⵏⵜⵉ ⵏⵏⵙ ⴷ ⵜⴽⵚⵚⴰⴹ ⵜⵉⵏⴰⵎⵓⵏⵉⵏ ⵏ ⵜⵉⴷⵜ ⵙⴳ ⵓⵣⵣⵏⵣ ⵏ ⵜⵏⵓⴼⴰ ⵜⵉⴷⵙⵍⴰⵏⵉⵏ ⴷⴰ ⵉⴽⵛⵎⵏ ⴳ ⵓⵙⴰⵜⵉ ⵏ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ ⴷ ⵓⵔ ⵉⵎⵙⴰⵙⴰⵏ ⴷ ⵓⵏⵏⵣⵔⴰⵢ ⵎⴽⵏⵏⴰ ⵉⵔⴰ ⵉⴳ ⵜ.

ⵉⵖⵜⵙ ⵓⵎⴰⵔⵉⵙ ⴰⵙⵔⵜⴰⵏ ⴰⴹⴼⴼⵓⵕ ⵏ ⵓⵙⵏⵜⵍ ⴷ ⵓⵎⵙⴳⴷⴰⵍ ⵏⵏⵙ ⵉⴷⵔⴰⵏ, ⵙ ⵎⴽⵍⵍⵉ ⴷ ⵉⵇⵇⴰⵏ, ⵉⴳⴳ ⵢⴰⵜ ⵜⵔⴰⴱⴱⵓⵜ ⵙⴳ ⵉⴳⵎⴰⵎⵏ ⵏⵏⵙ ⴰⴼⴰⴷ ⴰⴷ ⵜⵃⵉⵢⵢⵍ ⵢⴰⵜ ⵜⴼⵔⵜ ⵉⴼⴰⵡⵏ ⵅⴼ ⵓⵙⴷⴰⵡ ⴰⴷ, ⴳ ⵎⴰⴷ ⵏⵏ ⵓⵔ ⵢⴰⴳⴳⵓⴳ, ⵎⴽⵍⵍⵉ ⵉⵖⵜⵙ ⴰⵙⵏⵎⴰⵍⴰ ⵏ ⵢⴰⵏ ⵓⵏⵎⵓⵇⵇⴰⵔ ⴰⵎⵣⵔⴰⵡ ⵅⴼ ⵓⵙⵏⵜⵍ ⴰⴷ ⴳ ⵎⴰⴷ ⵢⴰⵥⵏ.

ⴰⵙⵙⵔⵖⵓⴷ ⵉ ⵜⵎⴰⴷⴷⴰⵙⵜ ⵜⴰⵏⵎⵍⴰⵢⵜ ⵙ ⵜⵎⵍⴷⴰ ⵏ ⵓⴽⵜⵜⴰⵢ 47 ⵏ ⵓⵙⵙⵏⵜⵉ ⵏⵏⵙ

ⵙ ⵜⵎⵍⴷⴰ ⵏ ⵓⴽⵛⵛⵓⵎ ⵏ ⵓⴽⵜⵜⴰⵢ ⵡⵉⵙⵙ 47 ⵏ ⵓⵙⵙⵏⵜⵉ ⵏ ⵜⵎⴰⴷⴷⴰⵙⵜ ⵜⴰⵏⵎⵍⴰⵢⵜ, ⴷⴰ ⵉⵙⵙⵏⴽⴰⴷ ⵓⵎⴰⵔⵉⵙ ⴰⵙⵔⵜⴰⵏ ⵉ ⵜⵎⴰⴷⴷⴰⵙⵜ ⵏⵏⵙ ⵏ ⵉⵄⵔⵔⵉⵎⵏ ⴷ ⵜⵎⵓⵣⵔⵜ ⵏⵏⵙ ⴷ ⵜⵎⵏⴰⵙⵉⵏ ⵏⵏⵙ ⴰⴽⴽⵯ ⴷ ⵉⵎⵖⵏⴰⵙⵏ ⵏⵏⵙ ⴳ ⵡⴰⵎⵓⵔ ⴰⵏⴰⵎⵓⵔ, ⵉⵙⵙⵔⵖⵓⴷⵏ ⵉⵥⵉⵍⵏ, ⵎⴽⵍⵍⵉ ⵉⵙⵙⵏⴽⴰⴷ ⴰⵙⵎⵖⵔ ⵏⵏⵙ ⵙ ⵓⵙⴰⴽⴰ ⴰⵎⵖⵏⴰⵙ ⵉⴱⵓⵖⵍⴰⵏ ⵏ ⵜⵎⴰⴷⴷⴰⵙⵜ ⴳ ⵢⵉⴳⵔ ⵏ ⵉⵄⵔⵔⵉⵎⵏ ⴷ ⵉⵎⵃⴹⴰⵕⵏ, ⴷ ⵉⵡⵉⵣ ⵏⵏⵙ ⴰⵙⵓⵍⴰⵏ ⵅⴼ ⵓⵎⵣⴰⵖ ⵅⴼ ⵜⵏⵓⴼⴰ ⵜⵉⵏⴰⵎⵓⵔⵉⵏ ⵜⵉⵏⴰⴼⵍⵍⴰⵜⵉⵏ ⴷ ⵅⴼ ⵜⵎⵙⴰⵔⵉⵏ ⵏ ⵜⵄⵄⵓⵔⵎⴰ, ⵙⴳ ⵓⵙⵙⵏⵜⵉ ⵙⴳ ⵜⵎⴰⴳⵉⵜ ⵜⴰⵏⴰⵎⵓⵔⵜ ⴷ ⵜⴷⵉⵎⵓⵇⵔⴰⵜⵉⵜ ⴷ ⵜⴼⴰⵔⴰⵏⵜ. ⵉⵜⵜⵔ ⵓⵎⴰⵔⵉⵙ ⴰⵙⵔⵜⴰⵏ ⵙⴳ ⵜⵎⴰⴷⴷⴰⵙⵜ ⵏⵏⵙ ⵜⴰⵖⵏⵙⴰ ⵓⴳⴳⴰⵔ ⴷ ⵓⵥⵓ ⴳ ⵡⴰⵏⵙⴰⵜⵏ ⴰⴽⴽⵯ ⵏ ⵉⵄⵔⵔⵉⵎⵏ, ⴷ ⵓⵙⵎⵙⴰⵙⴰ ⵏ ⵜⵎⴰⵎⴽⵉⵏ ⵏ ⵜⵡⵓⵔⵉ ⵏⵏⵙ ⴷ ⵉⵙⵏⴼⵍⵏ ⴷ ⵜⵎⴰⵢⵏⵓⵜⵉⵏ ⵜⵉⵏⴰⵎⵓⵏⵉⵏ.

ⵜⵓⴷⵔⵜ ⵜⴰⴳⵯⵏⵙⴰⵏⵜ ⵏ ⵏ ⵓⴽⴰⴱⴰⵕ

ⴷⴷⴰⵡ ⵏ ⵜⵙⵉⵍⴰ ⵏⵏⴰ ⵉⵙⵙⵏⴽⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⴽⴰⴱⴰⵕ, ⵉⴹⴼⵕ ⵓⵎⴰⵔⵉⵙ ⴰⵙⵔⵜⴰⵏ, ⴰⵎⵙⵡⵉⵍ ⵅⴼ ⵜⴱⵔⵉⴷⵉⵏ ⴷ ⵜⵎⵢⴰⴷⴰⵙⵉⵏ ⴷ ⵜⵎⴰⵎⴽⵉⵏ ⴱⵓⵖⵍⴰⵏⵉⵏ ⵏ ⵜⵡⵓⵔⵉ, ⴷ ⵅⴼ ⵜⵎⴰⵙⴰⵢⵉⵏ ⴷ ⵜⵎⵙⴽⵉⵔⵉⵏ ⵜⵓⴼⵔⵉⴷⵉⵏ ⴷ ⵜⵎⴳⵔⴰⵡⵉⵏ, ⵏⵏⴰ ⵙ ⴷ ⵉⵇⵇⴰⵏ ⴰⴷ ⴳⵏⵜ ⵜⴰⵔⵙⵍⵜ, ⵃⵎⴰ ⴰⴷ ⵢⵉⵍⵉ ⵓⵙⵎⵀⵍ ⴰⵎⵓⴼⴰⵢ ⵏ ⵜⵓⵎⴰⵢⵉⵏ ⵏ ⵡⴰⵔⵔⴰⵜⵏ ⵉⵙⴰⵖⵓⵍⵏ ⵏ ⵓⴽⴰⴱⴰⵕ, ⴳ ⵢⵉⴷⵉⵔ ⵏ ⵓⵙⴰⵜⵜⵓⵢ ⵏ ⵉⴳⴳⵉⵜ ⴰⵎⵙⵓⴷⵙ ⴷ ⵓⴳⴷⵓⴷⴰⵏ ⵏ ⵓⴽⴰⴱⴰⵕ, ⴰⴼⴰⴷ ⴰⴷ ⵢⵉⵍⵉ ⴳ ⵓⵙⵡⵉⵔ ⵍⵍⵉ ⴷⵉⵙ ⵢⵓⵙⴰⵏ ⴳ ⵓⴱⴰⵔⴰⵣ ⴰⵙⵔⵜⴰⵏ ⴰⵏⴰⵎⵓⵔ.