ⵜⴰⵙⴳⵓⵔⵉ ⵏ ⵓⵙⵉⵔⴰ ⴰⵙⵔⵜⴰⵏ ⵙ ⵎⴰⴷ ⵉⵥⵍⵉⵏ ⵙ ⵜⴰⵜⵜⵓⵢⵜ ⵏ ⵡⴰⵜⵉⴳⴳⵏ ⵏ ⵜⵎⵜⵜⴰⵡⵉⵏ ⵜⵉⵏⵙⵙⵓⵎⵔⴰ ⵕⵕⴱⴰⴹ, ⴳ 14 ⴱⵕⴰⵢⵕ 2023

ⵉⵥⵍⵉ ⵓⵙⵉⵔⴰ ⴰⵙⵔⵜⴰⵏ ⵏ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ ⵜⵓⴳⵜ ⵏ ⵉⴳⵔⴰⵡⵏ ⵏⵏⵙ, ⴰⵙⵙ ⵏ ⴰⵙⵉⵏⴰⵙ 14 ⴱⵕⴰⵢⵕ 2023, ⵉ ⵜⵣⵔⴰⵡⵜ ⵏ ⵓⵙⵏⵜⵍ ⵏ ⵜⴰⵜⵜⵓⵢⵜ ⵏ ⵡⴰⵜⵉⴳⴳⵏ ⵏ ⵜⵎⵜⵜⴰⵡⵉⵏ ⵜⵉⵏⵙⵙⵓⵎⵔⴰ ⵜⵉⴷⵙⵍⴰⵏⵉⵏ, ⵉⵙⵙⴼⵖ ⴷ ⴳ ⵓⵎⵏⴰⴹ ⴰⴷ ⵜⴰⵙⴳⵓⵔⵉ ⴷ ⵉⴷⴷⴰⵏ:

ⵉⵙⵙⵏⴽⴷ ⵓⵙⵉⵔⴰ ⴰⵙⵔⵜⴰⵏ ⴰⵎⵏⵓⵙ ⵏⵏⵙ ⵅⴼ ⵡⴰⴼⴰ ⵢⴰⵜⵜⵓⵢⵏ ⵏ ⵡⴰⵜⵉⴳⴳⵏ ⵏ ⵜⵎⵜⵜⴰⵡⵉⵏ ⵜⵉⵏⵙⵙⵓⵎⵔⴰ ⵜⵉⴷⵙⵍⴰⵏⵉⵏ, ⴳ ⵓⴳⴰⴷⴰⵣ ⴰⵏⴰⵎⵓⵔ, ⴳ ⵜⵉⵣⵡⵉⵔⵉ ⵏⵏⵙ ⴰⵜⵉⴳⴳⵏ ⵏ ⵜⵖⴰⵡⵙⵉⵡⵉⵏ ⵏ ⵡⵓⵜⵛⵉ, ⵙⵍⴰⵡⴰⵏ ⴰⴽⴽⵯ ⵉⴳⵓⵎⵎⴰ ⴷ ⵉⵛⴰⴽⴰⵏ ⴷ ⵜⴼⵢⵢⵉ ⴷ ⵉⵙⵍⵎⴰⵏ ⴷ ⵜⴳⵍⴰⵢ ⴷ ⵓⵣⴰⵜⵉⵎ ⴷ ⵓⴽⴼⴰⵢ, ⴷ ⵍⵍⵉⴳ ⵏⵙⵙⵏ ⵎⴰⵙ ⵢⴰⵥ ⵓⵣⵎⵣ ⵏ ⵡⴰⵢⵢⵓⵔ ⵏ ⵕⵎⴹⴰⵏ.

ⵜⴰⵜⵜⵓⵢⵜ ⴰⴷ ⵏ ⵡⴰⵜⵉⴳⴳⵏ ⵉⵀⵔⵛⵏ, ⵙⵓⵍ ⵉⵇⵇⵉⵎⵏ ⵙ ⵉⴷⵔⵉⵣⵏ ⵏⵏⵙ ⵅⵛⵏⵉⵏ, ⵉⵎⵉⵣⵉⵜⵏ ⵅⴼ ⵜⵣⵎⵔⵜ ⵜⴰⵎⵙⵖⵉⵡⵜ ⵏ ⵉⵎⵖⵔⴰⴱⵉⵢⵏ, ⴷⴰ ⵉⵜⵜⵙⴰⵔⴰⴳⵏ ⴳ ⵜⵎⵔⴰⵔⵓⵜⵉⵏ ⴷ ⵉⵙⵖⵓⵢⵢⵓⵜⵏ ⴳⴳⵓⵜⵏⵉⵏ. ⵙⴳ ⵉⵏⵣⵡⵉⵜⵏ ⵏ ⵓⵎⵏⵓⵙ ⴷ  ⵓⵔⴼⴰⵏ ⴷ ⵜⵖⵓⴼⴼⵉⵜ ⵉⴷⵓⵙⵏ ⴷⴰⵔ ⵜⵓⴳⵜ ⵏ ⵉⵡⴷⴰⵏ, ⵙⵍⴰⵡⴰⵏ ⴰⴽⴽⵯ ⴳ ⵡⴰⵎⵎⴰⵙ ⵏ ⵜⴳⵔⵓⵎⵎⴰⵡⵉⵏ ⵉⴷⴷⵔⵏ ⴳ ⵥⵍⴹ ⴷ ⵉⵍⵎⴹ. ⵜⵉⵍⴰⵡⵜ ⴰⴷ ⵉⵀⵔⵛⵏ ⵜⵙⵖⴰⵡⵙⴰ ⵙⴳ ⵜⵏⴱⴰⴹⵜ ⴰⴷ ⵜⵎⵎⴰⵙ ⵙ ⵜⴱⵔⵉⴷⵜ ⵜⴰⴷⵓⵙⴰⵏⵜ ⵜⴰⵔⵓⴷⴰⴷⵜ ⵉⵎⵓⵔⵙⵏ, ⵃⵎⴰ ⴰⴷ ⵏⴰⵏⴼ ⵉ ⵜⵏⵎⴰⵔⵜ ⵏ ⵡⴰⴷⴷⴰⴷⵏ ⴷ ⵓⴼⵔⴰⴳ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ.

ⴰⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ, ⵉⴷⴷⵖ ⵉⵙⵔⵙ ⵎⵏⵉⴷ ⵏⵏⵙ ⵉⵙⵔⴰⴳⵏ ⵉⵙⵏⵜⴰⵍ ⵏ ⵜⴰⵜⵜⵓⵢⵜ ⵏ ⵡⴰⵜⵉⴳⴳⵏ, ⵙⵍⴰⵡⴰⵏ ⴰⴽⴽⵯ ⴰⵢⵍⵍⵉ ⵉⵣⴷⵉⵏ ⴷ ⵜⵙⵓⵍⴰⵏⵜ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ, ⴷ ⵉⵀⵏⵓⵏⵏⵉⵜⵏ ⵉⴳⵔⴰⵖⵍⴰⵏⵏ ⵏⵏⴰ ⴳ ⵉⵙⴰⵔⴳ ⵉⵎⵏⵖⵉ ⴳ ⵓⴽⵕⴰⵏⵢⴰ, ⴷ ⵜⴰⵜⵜⵓⵢⵜ ⵏ ⵓⴼⵜⴰⵢ ⵏ ⵓⵣⴷⵓⵔ ⴰⵎⴰⴹⵍⴰⵏ, ⴷ ⵡⴰⴷⴷⴰⴷ ⵏ ⵜⵖⵓⵔⴰⵔⵜ ⴷ ⵉⵙⵔⴰⴳⵏ ⵏ ⵓⵏⵣⵡⵉ, ⵓⵔ ⴷ ⵉⵎⵙⴰⵙⴰ, ⴷ ⵓⵔ ⵉⴳⵉ ⴳ ⵜⵎⴰⵙⴰⵢⵜ, ⴰⴷ ⴼⵍⵍⴰⵖ ⵜⵙⴱⵣⵣⵉⵣ ⵜⵏⴱⴰⴹⵜ ⵉⵏⴰⵡ ⵏ ⴰⵎⴰⴽⴰⵣ ⴷ ⵜⵏⴽⴷⴰ ⵏ ⵜⵎⵛⵓⵛⵛⴰⴹ, ⴱⵍⴰ ⵜⴳⴳ ⵜⵉⵖⵜⴰⵙⵉⵏ ⴼⴰⵡⵏⵉⵏ ⵖⵓⵔ ⵍⵍⴰⵏⵜ ⵜⵢⴰⴼⵓⵜⵉⵏ ⵜⵉⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ, ⵜⵉⵏⵉⵍⴰⵡⵉⵏ ⴷ ⵜⵎⴰⵍⴰⵡⵉⵏ, ⴷⴰ ⵉⵣⵎⵔⵏ ⴰⴷ ⵙⵙⵉⴼⵙⵓⵙⵏⵜ ⴰⴷⵔⵉⵣ ⵏ ⵜⴰⵜⵜⵓⵢⵏ ⵏ ⵡⴰⵜⵉⴳⴳⵏ ⵅⴼ ⵉⵎⵖⵔⴰⴱⵉⵢⵏ.

ⴷ ⵉⴷⴷⵖ ⵉⴱⵉⴷⴷ ⵓⵙⵉⵔⴰ ⴰⵙⵔⵜⴰⵏ ⵅⴼ ⵜⵓⴳⵜ ⵏ ⵉⵙⴱⴷⴰⴷⵏ ⵏ ⵡⴰⴷⴷⴰⴷⵏ ⵉⴷⵎⵙⴰⵏⵏ ⴷ ⵉⵏⴰⵍⵓⵏⵏ ⵉⵙⴷⵖⵉⵜⵏ, ⵍⵍⵉ ⵅⴼ ⵉⴽⴽⴰ ⵓⴼⵔⵉⵙ ⵓⵣⴷⵉⵔ, ⵙ ⵎⴽⵍⵍⵉ ⵉⵙⴷⵉⴷⴷⵉⵢⵏ ⵓⵎⵄⵉⵏⵏ ⵏⵏⴰ ⵜⴳⴳ ⵜⵎⴰⵣⵉⵔⵜ ⵏⵏⵖ ⴳ ⵉⵙⴳⴳⵯⴰⵙⵏ ⵣⵔⵉⵏⵉⵏ, ⵎⴽⵍⵍⵉ ⵅⴼ ⵙⴷⴷⵉⴷⵏⵜ ⵜⵎⴰⴷⴷⴰⵙⵉⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⵎⴰⴷⴷⵓⴷⵉⵏ, ⴷⴰ ⵉⵙⵎⴰⵢⵏⵓ ⴰⵙⵎⴰⵙⵙ ⵏ ⵜⴰⵢⵏⵉⵜ ⵏ ⵜⵏⴱⴰⴹⵜ ⴰⴼⴰⴷ ⴰⴷ ⵜⴰⵏⴼ ⵉ ⵜⵎⵢⴰⴷⴰⵙⵜ ⵏⵏⵙ ⵜⴰⵜⵉⵜⵏⵓⵇⵕⴰⵟⵉⵜ ⴷ ⵜⴷⵓⵖⵎⴰⵢⵜ ⵉⵏⵏⵓⴽⵎⴰⵏ, ⵍⵍⵉ ⵓⵔ ⵉⵣⵎⵔⵏ ⴰⴷ ⵜⵡⵛ ⵉⴼⵙⴰⵢⵏ ⵉ ⵡⴰⴷⴷⴰⴷⵏ ⴰⴷ ⵛⵇⵇⴰⵏⵉⵏ, ⵎⵉⵏⵣⵉ ⵓⵔ ⵖⵓⵔⵙ ⴽⵔⴰ ⵏ ⵜⴰⵏⵏⴰⵢⵜ ⵜⴰⵙⵔⵜⴰⵏⵜ ⵜⴰⵖⵣⵓⵔⴰⵏⵜ ⵜⴰⵎⴰⴼⴰⵡⵜ ⵏⵏⴰ ⵉⴱⴷⴷⵏ ⵅⴼ ⴰⵢⵍⵍⵉ ⴷ ⵉⵇⵇⴰⵏ ⴳ ⵜⵙⵏⵜⴰⵢⵉⵏ ⴷ ⵓⵙⵉⵣⵡⵔ ⴷ ⵜⴼⴳⵔⴰⵛⵜ ⴷ ⵓⵙⵏⴼⵍⵓⵍ ⴷ ⵓⵙⵖⵉⵡⵙ.

ⴳ ⵓⵙⴰⵜⵉ ⴰⴷ, ⴷⴰ ⵉⵜⵜⵙⴷⴷⵉⴷ ⵓⵙⵉⵔⴰ ⴰⵙⵔⵜⴰⵏ ⵅⴼ ⵉⵙⵓⵎⴰⵔ ⴷ ⵉⵎⴽⴽⵉⵙⵉⵜⵏ, ⴷⴰ ⵉⵙⵙⵓⵎⵔ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ, ⵓⴳⴳⴰⵔ ⵏ ⵓⵙⴳⴳⵯⴰⵙ ⴰⵢⴰⴷ, ⴰⴼⴰⴷ ⴰⴷ ⵢⴰⵡⵙ ⴳ ⵓⵙⵙⵓⵔⴼ ⵏ ⵜⵎⴰⵣⵉⵔⵜ ⵏⵏⵖ ⵉ ⵜⴼⵔⴽⵜ ⴰⴷ ⵉⵀⵔⵛⵏ, ⵜⴳⴳ ⵜⵜ ⴷ ⵓⵙⵓⵍⴼ ⵏ ⵜⵏⴽⵔⴰ ⴷ ⵓⴱⵓⵖⵍⵓ ⴰⴷⵎⵙⴰⵏ ⴷ ⵜⵎⵔⵏⵉⵡⵜ ⵜⴰⵏⴰⵎⵓⵏⵜ. ⴳⴰⵏ ⵉⴼⵙⴰⵢⵏ ⴼⴰⵡⵏⵉⵏ, ⵙⵡⵓⵔⵉⵏ ⵙⵉⵙⵏ ⵜⵓⴳⵜ ⵏ ⵜⵏⴱⴰⴹⵉⵏ ⴳ ⵜⵎⵉⵣⴰⵔ ⵢⴰⴹⵏ, ⵜⵏⴷⴻⴷ ⵏⵜⵜⴰⵜ ⵜⵏⴱⴰⴹⵜ ⴰⴷ ⴳ ⵜⵎⴰⵣⵉⵔⵜ ⵏⵏⵖ, ⴷ ⵙⵓⵍ ⵜⵇⵇⵉⵎ, ⵅⴼ ⵓⴽⵓⴷⴷⵍ ⵏⵏⵙ ⴷ ⵜⵙⴼⵙⵓⵜ ⵏⵏⵙ.

ⵙ ⵜⴱⵔⵉⴷⵜ ⵜⴰⵎⵏⵖⵓⴷⵜ, ⴷ ⴳ ⵓⵎⵏⴰⴹ ⵏ ⵜⴰⵜⵜⵓⵢⵜ ⵜⴰⴷⵓⵙⴰⵏⵜ ⵏ ⵡⴰⵜⵉⴳⴳⵏ ⴷ ⵓⵀⵏⵓⵏⵏⵉ ⵏ ⵜⵣⵎⵔⵜ ⵜⴰⵎⵙⵖⵉⵡⵜ, ⴷⴰ ⵉⵙⵎⴰⵢⵏⵓ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ ⴰⵙⵓⵜⵔ ⵏⵏⵙ ⵉ ⵜⵏⴱⴰⴹⵜ ⵃⵎⴰ ⴰⴷ ⵜⵡⵛ ⵉⵙⵉⵣⵡⵔⵏ ⵉ ⵜⵏⴼⵔⵓⵜ ⵜⴰⵎⵙⴰⴷⵓⵔⵜ ⵜⴰⵏⴰⵎⵓⵔⵜ. ⴰⴽⴷ ⴰⵢⵍⵍⵉ ⴷ ⵉⵇⵇⴰⵏ ⵎⴰⵢⴰⵏ ⴳ ⵓⵙⵜⴰⵍ ⴰⵙⵏⵜⴰⵍ ⴰⴼⴳⵔⴰⵛ ⵉ ⵉⵢⴰⴼⵓⵜⵏ ⵏ ⵜⵡⵏⴰⵖⵜ ⵏ ⵍⵎⵖⵔⵉⴱ ⴰⵣⴳⵣⴰⵡ, ⴷ ⵡⴰⵍⵍⴰⵙ ⵉⴷⵔⴰⵏ ⵉ ⵜⵙⵔⵜⵉⵜⵉⵏ ⵜⵉⴽⵔⵣⴰⵏⵉⵏ ⴷⴰ ⵓⵔ ⵉⵎⵓⵔⵙⵏ, ⴰⵔ ⵖⵉⵍⴰⴷ, ⴳ ⵓⵙⵙⵖⵍⴼ ⵏ ⵓⵃⵟⵟⵓ ⴰⵙⵜⵔⴰⵜⵉⵊⵉ ⴷ ⵉⴳⴳⵉⵜ ⵏ ⵜⴳⵣⵉ ⵜⴰⵏⵉⵎⴰⵏⵜ ⵜⴰⵏⴰⵎⵓⵔⵜ ⵙⴳ ⵜⵖⴰⵡⵙⵉⵡⵉⵏ ⵏ ⵡⵓⵜⵛⵉ.

ⵎⴽⵍⵍⵉ ⴷⵉⴳⵙ ⵜⵜⴻⵜⵜⵔ ⵉⴳⴳⵉⵜⵏ ⵉⵏⵉⵍⴰⵡⵏ ⵉⵎⵏⵍⵍⵉⵜⵏ, ⵙ ⵜⴱⵔⵉⴷⵉⵏ ⵜⵉⵔⴳⴰⵢⵉⵏ ⴷ ⵜⵉⴷ ⵉⵣⴷⵉⵏ ⴷ ⵜⴷⵉⵡⴰⵏⵉⵜ, ⴷ ⵙ ⵡⴰⵏⵏⴰⵍ ⵏ ⵜⵎⵇⵕⴰⴹ ⴷ ⵜⵏⴽⵛⵓⵎⵉⵏ ⵏ ⵓⴼⴰⵔⵙ, ⵃⵎⴰ ⴰⴷ ⵢⵉⵍⵉ ⵓⵙⵙⵉⴷⵔⵓⵙ ⵏ ⵡⴰⵜⵉⴳⴳⵏ ⴷ ⵓⴹⴰⴽⴰⵍ ⵏ ⵓⴼⵣⵓⴽⵎ ⵓⵏⵣⵉⵍ ⴰⵏⴰⴼⵙⴰⵙ ⵉ ⵓⴳⴰⴷⴰⵣ ⴰⵏⴰⵎⵓⵔ ⵙ ⵜⵎⴰⵜⵜⴰⵡⵉⵏ ⵜⵉⵏⵙⵙⵓⵎⵔⴰ ⵜⵉⴷⵙⵍⴰⵏⵉⵏ ⵜⵉⴷⵙⵍⴰⵏⵉⵏ.

ⴷ ⴰⵔ ⵉⵜⵜⵙⴷⴷⵉⴷ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ ⵎⴰⵙ ⴷ ⵉⵇⵇⴰⵏ ⴰⴷ ⵜⵙⵖⵓⴷⵓ ⵜⵏⴱⴰⴹⵜ ⴰⵙⵡⵓⵔⵉ ⵏ ⵉⵙⵓⴳⴰⵎ ⵉⵥⵕⴼⴰⵏⵏ ⵉⵎⵔⵏⵉⵡⵏ ⵓⵙⵍⵉⴷⵏ ⴳ ⵜⵏⴽⴷⴰ ⵏ ⵜⵏⴰⵍⵉⵜ ⵜⵓⵙⵔⵉⴷⵜ ⵉ ⵜⵡⵊⵉⵡⵉⵏ ⵉⴷⴷⵔⵏ ⴳ ⵥⵥⵍⴹ ⴷ ⵢⵉⵍⵎⴹ, ⴷ ⵉⴳⵔⴰⵏ ⵏⵏⴰ ⵜⵍⴽⵎ ⵜⵡⴰⵖⵉⵜ ⴰⴷ, ⴷ ⵓⵙⵖⵓⴷⵓ ⵏ ⵜⵖⵔⴰⴷ ⵏ ⵉⵎⵙⵡⵓⵔⵉⵢⵏ ⴰⴽⴽⵯ.

ⵎⴽⵍⵍⵉ ⵉⵜⵜⵙⴷⴷⵉⴷ ⵓⵙⵉⵔⴰ ⴰⵙⵔⵜⴰⵏ ⵅⴼ ⵓⵏⴱⵣⴰⵣ ⵏ ⵓⵙⵎⵔⵙ ⵏ ⵜⵏⴱⴰⴹⵜ ⵉ ⵉⵎⴰⵙⵙⵏ ⴰⴽⴽⵯ, ⵃⵎⴰ ⴰⴷ ⵜⵉⵍⵉ ⵜⵉⴹⴰⴼ ⵏ ⵓⴳⴰⴷⴰⵣ ⴰⵏⴰⵎⵓⵔ, ⴷ ⵓⵟⵟⵓⴼ ⵏ ⵓⵙⴷⴷⵉ ⵏ ⵓⵙⴳⴷⵣ, ⴳ ⵓⵎⵣⵡⴰⵔⵓ ⵙ ⵓⴹⴰⴽⴰⵍ ⵏ ⵓⴼⴰⵔⵙ, ⴷ ⵜⵉⴹⴰⴼ ⵏ ⵓⵣⵣⵏⵣ ⵏ ⵉⵢⴰⴼⵓⵜⵏ, ⴷ ⵓⵙⵉⵡⴰⵏ ⵏ ⵜⵎⵙⴽⴰⵔ ⵏ ⵉⴱⵔⵖⴰⵣⵏ ⴷ ⵉⵏⴰⵎⵎⴰⵙⵏ. ⵡⴰⴷ ⴰⴱⵔⵉⴷ ⵉⵎⵓⵔⵙⵏ ⵉ ⵓⵙⵡⵓⵜⵜⵓ ⴷ ⵓⵎⵓⵜⵍ ⴰⴷⵓⵙⴰⵏ ⵉ ⵜⵎⵙⴽⵉⵔⵉⵏ ⴰⴽⴽⵯ ⵜⵉⵏⵙⴱⴰⴱⵉⵏ ⴰⵔⵜⵓⵣⵔⵉⴼⵉⵏ, ⵉⴳⴰⵏ ⵙ ⵜⵉⴷⵜ ⵜⵉⴱⴽⴽⴰⴹⵉⵏ, ⵍⵍⵉⴳ ⵜⴽⵛⵎ ⵜⴱⵔⵛⵣⵜ ⴷ ⵓⴽⵡⴰⵛ ⴷ ⵓⵃⵟⵟⵓ ⴰⵏⴼⴼⴰⵔ ⵏ ⵙⵙⵍⵉⵄⵜ ⴷ ⵓⵙⵓⵔⴰⵔ ⵙ ⵡⴰⵜⵉⴳⴳⵏ ⴷ ⵓⵖⵓⴷⵓ.

ⵉⴷⴷⵖ ⴷⴰ ⵉⵜⵜⵣⵎⵎⵉⵎ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ ⵎⴰⵙ ⴷ ⴰⵏⵏⴰⵍ ⵏ ⵉⴷ ⴱⴰⴱ ⵏ ⵡⴰⵙⵙⴰⵢ ⵓⵔ ⵖⵓⵔⵙ ⵛⴰ ⵏ ⵓⴷⵔⵉⵣ ⴰⵏⵉⵍⴰⵡ ⴰⵎⴰⵍⴰⵡ ⵅⴼ ⵡⴰⵜⵉⴳⴳⵏ ⵏ ⵜⵎⴰⵜⵜⴰⵡⵉⵏ ⵜⵉⵏⵙⵙⵓⵎⵔⴰ, ⴰⵡⴷ ⵅⴼ ⵓⵙⵡⵉⵔ ⴰⵎⴰⴷⴷⵓⵔ ⵏ ⵜⵏⵎⵓⵔⵉⵜⵉⵏ ⴷ ⵉⵏⵎⵓⵔⵉⵜⵏ, ⴷⴰ ⵉⵙⵙⵓⵜⵓⵔ ⴳ ⵜⵏⴱⴰⴹⵜ ⴰⴷ ⵜⵉⴼⵙⵓⵙ ⵜⴳⴳ ⴰⵙⵜⴰⵍ ⵉ ⵓⵙⵡⵓⴷⴷⵓ ⴰⴷ ⴰⵎⵥⵍⴰⵢ ⴰⴼⴰⴷ ⴰⴷ ⵢⵉⵍⵉ ⵡⴰⵍⵍⴰⵙ ⵏⵏⵙ.

ⵎⴽⵍⵍⵉ ⵉⵙⵎⴰⵢⵏⵓ ⴰⵙⵓⵜⵔ ⵏⵏⵙ ⵉ ⵜⵏⴱⴰⴹⵜ ⴰⴷ ⵜⵔⴰⵔ ⴰⵙⵡⵓⵔⵉ ⵏ ⵜⵎⵣⵉⵣⴷⴳⵜ ⵏ ⵍⴰⵙⴰⵎⵉⵔ, ⵉⴷⴷⵖ ⵜⵉⵍⴰⵍ ⵜⵉⵎⴰⵍⴰⵡⵉⵏ ⵖⵓⵔⵙ ⵉⵍⵍⴰⵏ ⴳ ⵡⴰⵍⵍⴰⵙ ⴷ ⵓⵃⵟⵟⵓ ⵏ ⵜⵎⴰⵜⵜⴰⵡⵉⵏ ⵏ ⵓⴱⵉⵟⵕⵓⵍ, ⵙ ⵓⵢⴰ ⴰⴷ ⵢⵉⵍⵉ ⵓⵙⵙⵉⴷⵔⵓⵙ ⵏ ⵡⴰⵜⵉⴳⴳⵏ ⴰⴷⴷⴰⴷ ⵏ ⵓⵣⵣⵏⵣ, ⴷ ⵓⵙⵓⵊⴷ ⵏ ⵜⵏⴼⵔⵓⵜ ⵜⴰⵏⵣⵎⵔⵜ ⵜⴰⵏⴰⵎⵓⵔⵜ, ⴷ ⵓⴷⵔⵉⵣ ⴰⵎⴰⵍⴰⵡ ⴳ ⵡⴰⵜⵉⴳⴳⵏ ⵜⵎⴰⵜⵜⴰⵡⵉⵏ ⵜⵉⵏⵙⵙⵓⵎⵔⴰ ⵢⴰⴹⵏ ⴳ ⵓⵙⴰⴽⴰ ⵏ ⵓⴳⵓⵣ ⵏⵏⵙⵏⵜ.

ⴰⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ, ⵙ ⵎⴽⵍⵍⵉ ⴷ ⵉⵎⵙⴰⵙⴰⵏ ⴷ ⵡⴰⵏⵙⴰ ⵏⵏⵙ ⴰⵏⴰⵎⵓⵏ, ⴷ ⵙⴳ ⵜⵎⴰⵙⴰⵢⵜ ⵍⵍⵉ ⵙ ⵜⵜⵡⴰⵙⵙⵏⵏ ⵉⵎⵏⴰⴷⵏ ⵏⵏⵙ, ⴷⴰ ⵉⵙⵙⵓⵜⵓⵔ ⴳ ⵜⵏⴱⴰⴹⵜ, ⵙ ⵜⴷⵓⵙⵉ ⵉⴳⴳⵓⵜⵏ, ⴰⴷ ⵜⴳⴳ ⵜⵉⵖⵜⴰⵙⵉⵏ ⵜⵉⵔⵓⴷⴰⴷⵉⵏ ⵜⵉⵖⵣⵓⵔⴰⵏⵉⵏ ⵎⵎⵓⵔⵙⵏⵉⵏ, ⴰⴼⴰⴷ ⴰⴷ ⵢⵉⵍⵉ ⵓⴼⵔⴰⴳ ⴷ ⵡⴰⵏⵏⴰⵍ ⵏ ⵜⵣⵎⵔⵜ ⵜⴰⵎⵙⵖⵉⵡⵜ ⵏ ⵉⵎⵖⵔⵉⴱⵉⵢⵏ, ⴷ ⵓⵙⵓⵊⴷ ⵏ ⵓⴼⵣⵓⴽⵎ ⴷ ⵉⵇⵇⴰⵏ ⵏ ⵜⵎⴰⵜⵜⴰⵡⵉⵏ ⵜⵉⵏⵙⵙⵓⵎⵔⴰ ⴷ ⵜⵉⵎⵙⴰⴷⵓⵔⵉⵏ ⴳ ⵓⴳⴰⴷⴰⵣ ⴰⵏⴰⵎⵓⵔ, ⵙ ⵡⴰⵜⵉⴳⴳⵏ ⵉⵎⵏⵍⵍⵉⵜⵏ, ⵎⴽⵍⵍⵉ ⴷⵉⴳⵙ ⵉⵜⵜⴻⵜⵜⵔ ⴰⴷ ⵜⴰⵏⴼ ⵜⵙⴼⵙⵓⵜ ⵏⵏⵙ ⵙ ⵡⴰⴷⴷⴰⴷⵏ ⵉⵏⴰⵎⵓⵏⵏ ⵉⵎⴰⵍⴽⴰⵢⵏ ⴷ ⵜⵎⵔⴰⵔⵓⵜⵉⵏ ⴷⴰ ⵉⵣⵎⵔⵏ ⴰⴷ ⵜⵜⵉⴳⵓⵜⵏⵜ ⴰⵙⵙ ⵅⴼ ⵡⴰⵙⵙ.

ⵎⵏⵉⴷ ⵏ ⵉⵎⵉⵣⵉ ⵏ ⵡⴰⴷⴷⴰⴷⵏ ⴰⴷ ⴷ ⵓⵏⵖⴰⴷ ⵏⵏⵙⵏ, ⴷ ⵓⵏⴱⵣⴰⵣ ⵏ ⵉⴹⵉⵚ ⴰⵎⴰⵍⴰⵡ ⵅⴼ ⵉⵡⵏⵏⵉⵜⵏ ⴰⴽⴽⵯ ⵏ ⵜⵙⴽⴰⵏⵉⵏ ⵜⵜⵉⴳⵓⵜⵏⵉⵏ ⵙ ⵜⴱⵔⵉⴷⵉⵏ ⴰⴽⴽⵯ ⵜⵓⵣⵔⵉⴼⵉⵏ ⵜⵉⵎⵙⵜⴳⴳⴰⵔⵉⵏ, ⴷ ⵓⵏⴱⵣⴰⵣ ⵏ ⵜⵡⵉⵙⵉ ⴳ ⵓⵜⵓⵢ ⵏⵏⵙⵏⵜ, ⴷ ⵓⵍⴽⴰⵎ ⵏ ⵓⵡⵜⵜⴰⵙ ⵏⵏⵙⵏⵜ ⴳ ⵓⵏⵜⵓⵢ ⵏ ⵜⵏⴱⴰⴹⵜ ⴰⴷ ⵜⴳⴳ ⵜⵉⵎⴳⴳⵉⵢⵉⵏ ⴷ ⵉⵇⵇⴰⵏ ⴰⴼⴰⴷ ⴰⴷ ⵢⵉⵍⵉ ⵓⵙⵙⵉⴷⵔⵓⵙ ⵏ ⵡⴰⵜⵉⴳⴳⵏ, ⴷⴰ ⵉⵜⵜⴰⵣⵏ ⵓⵙⵉⵔⴰ ⴰⵙⵔⵜⴰⵏ ⵢⴰⵏ ⵓⵖⵓⵔⵉ ⴰⴷⵓⵙⴰⵏ ⵉ ⵜⵎⵖⵏⴰⵙⵉⵏ ⴷ ⵉⵎⵖⵏⴰⵙⵏ ⴰⴽⴽⵯ ⵏ ⵓⴽⴰⴱⴰⵔ, ⴷ ⵡⴰⵍⵍⴰⵍⵏ ⵏⵏⵙ ⵉⵎⵏⴰⵡⴰⵢⵏ, ⴰⴼⴰⴷ ⴰⴷ ⵣⵎⵎⵉⵎⵏ ⵜⵉⵍⵉⵜ ⵏⵏⵙⵏ ⵜⴰⵏⴱⴷⴰⴷⵜ ⵜⴰⵎⵚⴽⴰⵡⵜ ⵜⵓⵎⵏⵉⴳⵜ ⴰⴳⵏⵙⵓ ⵏ ⵉⵡⵏⵏⵉⵜⵏ ⴰⴷ ⴰⴽⴽⵯ.