ⴰⵙⵉⵡⴹ ⴰⵏⵖⵎⴰⵙ ⵅⴼ ⵓⴳⵔⴰⵡ ⵏ ⵓⵎⴰⵔⵉⵙ ⴰⵙⵔⵜⴰⵏ ⵏ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ ⴰⵙⵙ ⵏ ⴰⵙⵉⵏⴰⵙ 21 ⵎⴰⵕⵚ 2023
ⴰⵙⵙⵔⵖⵓⴷ ⵙ ⵜⵎⵍⴷⴰ ⵏ ⵡⴰⵢⵢⵓⵔ ⵏ ⵕⵎⴹⴰⵏ ⵉⵖⵓⴷⴰⵏ
ⴳ ⵓⵎⵣⵡⴰⵔⵓ ⵏ ⵓⴳⵔⴰⵡ ⵏⵏⵙ ⴰⵏⵎⴰⵍⴰⵙⵙ ⵏ ⵡⴰⵙⵙ ⵏ ⴰⵙⵉⵏⴰⵙ 21 ⵎⴰⵕⵚ 2023, ⴷⴰ ⵉⵙⵙⵏⴽⴰⴷ ⵓⵎⴰⵔⵉⵙ ⴰⵙⵔⵜⴰⵏ ⵏ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ, ⵙ ⵜⵎⵍⴷⴰ ⵏ ⵡⴰⴷⴰⵙ ⵏ ⵓⴽⵛⵛⵓⵎ ⵏ ⵡⴰⵢⵢⵓⵔ ⵏ ⵕⵎⴹⴰⵏ ⵉⵖⵓⴷⴰⵏ, ⵉⵙⵙⵔⵖⵓⴷⵏ ⵏⵏⵙ ⵥⵉⵍⵏⵉⵏ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴷ ⴰⵢⵜ ⵜⵡⵊⴰ ⴰⴽⴽⵯ ⵜⴰⴳⵍⴷⴰⵏⵜ ⵜⴰⵎⴰⵖⵓⴷⵜ, ⴷ ⵓⴳⴷⵓⴷ ⴰⵎⵖⵔⵉⴱⵉ ⴷ ⵎⴰⵕⵕⴰ ⵜⵉⵎⵖⵏⴰⵙⵉⵏ ⴷ ⵉⵎⵖⵏⴰⵙⵏ ⵏ ⵓⴽⴰⴱⴰⵔ.
ⴰⴷⴷⴰⴷⵏ ⵉⴷⵎⵙⴰⵏⵏ: ⵓⵎⵍⴰⵏ ⵉⵎⴰⴷⴷⵓⴷⵏ ⵉⵜⵜⴳⴳⵏ ⴰⵏⵣⴳⵓⵎ ⵜⵙⵔⵙ ⵉⵙⵇⵙⵉⵜⵏ ⵅⴼ ⵓⵎⵓⵔⵙ ⵏ ⵉⴳⴳⵉⵜ ⵏ ⵜⵏⴱⴰⴹⵜ
ⵉⵙⵉⵡⵍ ⵓⵎⴰⵔⵉⵙ ⴰⵙⵔⵜⴰⵏ ⵏ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ, ⴳ ⵓⵎⵣⵡⴰⵔⵓ, ⴽⵔⴰ ⵏ ⵉⴼⵔⵉⵙⵏ ⵏ ⵡⴰⴷⴷⴰⴷⵏ ⵉⴷⵎⵙⴰⵏⵏ ⵉⵏⴰⵎⵓⵔⵏ, ⵙ ⵉⴷⵔⵉⵣⵏ ⵏⵏⵙ ⵉⵏⴰⵎⵓⵏⵏ, ⴷⴷⴰⵡ ⵏ ⵓⵎⵍⴰⵏ ⵉⵎⴰⴷⴷⵓⴷⵏ, ⵙⵍⴰⵡⴰⵏ ⴰⴽⴽⵯ ⵡⵉⴷ ⵜⵙⵙⴼⵖ ⵜⵏⵓⵔⴰⵢⵜ ⵜⴰⵎⴰⵜⵜⴰⵢⵜ ⵉ ⵓⵙⵖⵉⵡⵙ ⴷ ⵍⴱⴰⵏⴽ ⵏ ⵍⵎⵖⵔⵉⴱ, ⵉⵣⵎⵎⵉⵎ ⵉⵙⵇⵙⵉⵜⵏ ⵉⵎⵇⵇⵔⴰⵏⵏ ⵡⵛⵏ ⵓⵎⵍⴰⵏ ⴰⴷ ⵉⵥⵍⵉⵏ ⵙ ⵓⵙⵡⵓⵜⵜⵓ ⵏ ⵉⴳⴳⵉⵜ ⵏ ⵜⵏⴱⴰⴹⵜ ⴳ ⵓⵙⵡⵉⵔ ⴰⴷⵎⵙⴰⵏ ⴷ ⵓⵏⴰⵎⵓⵏ.
ⵉⴱⴷⴷ ⵓⵍⴰ ⵓⵎⴰⵔⵉⵙ ⴰⵙⵔⵜⴰⵏ ⵅⴼ ⵓⵟⵟⵓⵏⵏ ⵓⵣⴷⵉⵔⵏ ⵉⵏⵏⵣⴳⵓⵎⵏ ⵉⵥⵍⵉⵏ ⵙ ⵓⵙⵏⵉⵎⴰⵍ ⵏ ⵓⵙⵖⵍ ⵏ ⵜⴳⵎⵉ; ⴷ ⵜⴰⵜⵜⵓⵢⵜ ⵜⴰⵎⵇⵇⵔⴰⵏⵜ ⵏ ⵓⴽⴷⵎ ⵏ ⵓⴳⴰⵍⴰⵣ ⴰⵏⵙⴱⴰⴱ; ⴷ ⵜⵙⵓⵍⴰⵏⵜ ⵏ ⵜⴰⵣⵣⴰⵣⵜ ⵏ ⵓⴼⵜⴰⵢ ⴷⴰ ⵉⵡⴹⵏ ⵉⵙⵡⵉⵔⵏ ⵉⵎⵣⵔⴰⵢⵏ ⵜⵜ ⵉⵏⵏ ⵊⵊⵓ ⵓⵔ ⵉⴽⴽⵉⵏ; ⴰⵡⴷ ⵅⴼ ⵜⴼⵓⵛⴰⵢ ⵜⵓⵣⴷⵉⵔⵉⵏ ⵏ ⵓⴳⴰⴷⴰⵣ ⵏ ⵜⵡⵓⵔⵉ, ⵙⵍⴰⵡⴰⵏ ⴰⴽⴽⵯ ⴳ ⵢⵉⴳⵔ ⴰⵎⴳⵓⵔⴰⵏ.
ⵉⵖⵜⵙ ⵓⵎⴰⵔⵉⵙ ⵙ ⵓⵙⵓⵍⴼ ⴰⴷ, ⴰⴷ ⵉⴹⴼⵕ ⴳ ⵓⵎⵙⴳⴷⴰⵍ ⵉⴷⵔⴰⵏ ⵏ ⵓⵟⵟⵓⵏⵏ ⴰⴷ ⴷ ⵓⵎⵍⴰⵏ ⴰⴷ ⵉⵏⵏⵣⴳⵓⵎⵏ ⴳ ⵓⴳⵔⴰⵡ ⵏⵏⵙ ⴷ ⵢⵓⵙⴰⵏ.
ⴰⵙⵓⵜⵔ ⵉ ⵜⵏⴱⴰⴹⵜ ⴰⴷ ⵜⴳⴳ ⵜⴰⵎⴰⵙⴰⵢⵜ ⵏⵏⵙ ⵎⵏⵉⴷ ⵏ ⵍⵖⵍⴰ ⵉⴳⴳⵓⵜⵏ ⵏ ⵡⴰⵜⵉⴳⴳⵏ
ⴷⴰ ⵉⵙⵎⴰⵢⵏⵓ ⵓⵎⴰⵔⵉⵙ ⴰⵙⵔⵜⴰⵏ ⵜⴰⵔⴰⵔⵜ ⵏⵏⵙ ⵜⴰⵖⴹⴼⵜ ⵏ ⵜⵏⴱⴰⴹⵜ ⵉ ⵉⵎⵉⵣⵉ ⵉⵎⵓⵏⵏ ⴷ ⵓⵙⵉⴽⵉ ⵏ ⵓⵎⵓⵙⵙⵓ ⴰⵏⵉⵍⴰⵡ ⴷ ⵓⴽⵛⵛⵓⵎ ⵉⵎⵓⵔⵙⵏ, ⴰⴼⴰⴷ ⴰⴷ ⵢⵉⵍⵉ ⵓⴼⵔⴰⴳ ⵏ ⵓⴼⵔⴰ ⴰⵏⴰⵎⵓⵏ, ⵙ ⵜⴱⵔⵉⴷⵜ ⵏ ⵜⵎⴳⴳⵉⵢⵉⵏ ⵜⵉⴷⵓⵙⴰⵏⵉⵏ ⵜⵉⵏⵉⵍⴰⵡⵉⵏ, ⵉ ⵜⵏⴰⵍⵉⵜ ⵏ ⵜⵣⵎⵔⵜ ⵜⴰⵎⵙⵖⵉⵡⵜ ⵜⴰⵎⵀⵏⵓⵏⵏⵉⵜ ⵏ ⵉⵎⵖⵔⵉⴱⵉⵢⵏ ⴰⴽⴽⵯ ⵙ ⵡⴰⵏⴰⵡⵏ ⵏⵏⵙⵏ, ⴷ ⵓⵙⴱⴷⴷⵉ ⵏ ⵍⵖⵍⴰ ⵉⴳⴳⵓⵜⵏ ⴳ ⵡⴰⵜⵉⴳⴳⵏ ⵏ ⵓⴽⵎⵉⴹⵏ ⴷ ⵜⵖⴰⵡⵙⵉⵡⵉⵏ ⴰⴽⴽⵯ ⵜⵉⵏⵙⵙⵓⵎⵔⴰ ⵜⵉⴷⵙⵍⴰⵏⵉⵏ.
ⵙ ⵓⵢⴰ, ⴷⴰ ⵉⵥⵕⵕⴰ ⵓⵎⴰⵔⵉⵙ ⴰⵙⵔⵜⴰⵏ ⵜⴰⵙⵓⵍⴰⵏⵜ ⵏ ⵜⵏⴱⴰⴹⵜ ⴳ ⵓⵙⵏⵥⵉ ⵙ ⵉⵏⴷⵓⴷⵉⵢⵏ ⵉⴳⵔⴰⵖⵍⴰⵏⵏ ⴷ ⴰⵙⴽⴽⵉⵏ ⵓⵔ ⵉⵎⵙⴰⵙⴰⵏ. ⵎⴽⵍⵍⵉ ⵜⴳⴰ ⵜⵙⵓⵍⴰⵏⵜ ⵏ ⵜⴰⵜⵜⵓⵢⵜ ⵏ ⵡⴰⵜⵉⴳⴳⵏ ⵏ ⵓⴽⵎⵉⴹⵏ ⴳ ⵜⵎⴰⵣⵉⵔⵜ ⵏⵏⵖ ⴳ ⵡⴰⴷⴷⴰⴷ ⵏ ⵜⵙⵎⵓⵔⵜ ⴰⵙⴽⴽⵉⵏ ⵓⵔ ⵉⴳⵉⵏ ⵓⵏⵣⵉⵍ, ⴷ ⵓⵔ ⵉⵎⵙⴰⵙⴰ ⴰⴽⴷ ⵡⴰⵍⵍⴰⵙ ⵏ ⵡⴰⴷⴷⴰⴷⵏ ⴳ ⵉⴳⴰⴷⴰⵣⵏ ⵉⴳⵔⴰⵖⵍⴰⵏⵏ ⵉⵎⵉⴽⴽ ⵙ ⵉⵎⵉⴽⴽ ⴳ ⵢⵉⵔⵏ ⵉⵎⴳⴳⵓⵔⴰ, ⵉⴷⴷⵖ ⵉⴹⵕ ⵡⴰⵜⵉⴳ ⵏ ⵙⵙⵍⵉⵄⵜ ⵜⴰⴷⵙⵍⴰⵏⵜ ⴳ ⵓⴳⴰⴷⴰⵣ ⴰⴳⵔⴰⵖⵍⴰⵏ ⴰⵔ ⵉⵙⵡⵉⵔⵏ ⵢⴰⵥⵏ ⵉ ⵡⵉⴷ ⵉⵜⵜⵓⵣⵎⵎⴰⵎⵏ ⴷⴰⵜ ⵏ ⵜⵉⵣⵡⵉⵔⵉ ⵏ ⵉⵎⵉⵖ ⴳ ⵓⴽⵔⴰⵏⵢⴰ.
ⴰⵡⴷ, ⵉⴱⴷⴷ ⵓⵎⴰⵔⵉⵙ ⴰⵙⵔⵜⴰⵏ ⵅⴼ ⵉⵙⵙⵉⴼⵙⵓⵙⵏ ⵉⵎⵉⵡⴰⵏⵏ ⴷⴰ ⴰⴽⴽⴰⵏ ⴽⵔⴰ ⵏ ⵉⴳⵎⴰⵎⵏ ⵏ ⵜⵏⴱⴰⴹⵜ, ⴷ ⵓⵔ ⵢⵓⵙⵉⵏ ⴷ ⵜⵉⴷⵜ, ⵎⴽⵍⵍⵉ ⵜⵏ ⵙⴽⵉⵔⴽⵉⵙⵏ ⵓⵟⵟⵓⵏⵏ ⵉⵎⴰⴷⴷⵓⴷⵏ, ⵉⴷⴷⵖ ⵉⵣⵎⵎⵉⵎ ⵓⵟⵟⵓⵏ ⵉⵎⵙⵙⵏⵥⴰⵢⵏ ⵏ ⵡⴰⵜⵉⴳⴳⵏ ⴳ ⵜⵙⵓⵎⵔⴰ ⵜⴰⵜⵜⵓⵢⵜ ⵜⴰⵎⵇⵇⵔⴰⵏⵜ ⵉⵣⵔⵉⵏ 10% ⴳ ⵡⴰⵢⵢⵓⵔ ⵏ ⴱⵕⴰⵢⵕ 2023, ⵙ ⵓⵙⵔⴰⴳ ⵏ ⵜⴰⵜⵜⵓⵢⵜ ⵜⵓⵙⵍⵉⴷⵜ ⵏ ⵓⵟⵟⵓⵏ ⴰⵎⵙⵙⵏⵥⴰⵢ ⵏ ⵜⵖⴰⵡⵙⵉⵡⵉⵏ ⵏ ⵡⵓⵜⵛⵉ ⴰⵔ ⵓⴳⴳⴰⵔ ⵏ 20%.
ⵉⵎⵣⴰⵣⴰⵍⵏ ⴰⴷ ⵉⵍⵍⴰⵏ ⵏⴳⵔ ⵜⵙⴳⵓⵔⵉⵡⵉⵏ ⵜⵓⵏⴱⵉⴹⵉⵏ ⴷ ⵜⵉⵍⴰⵡⵜ ⵏ ⵡⴰⴷⴷⴰⴷⵏ ⵉⵏⴰⵎⵓⵏⵏ, ⴷⴰ ⵎⵎⴰⵍⵏ ⵎⴰⵙ ⴷ ⵜⴰⵏⴱⴰⴹⵜ ⴰⵔ ⵜⵙⵡⵓⴷⴷⵓ ⵜⴰⵎⵙⴰⵔⵜ ⵏ ⵍⵖⵍⴰ ⵏ ⵡⴰⵜⵉⴳⴳⵏ ⵙ ⵓⴽⵓⴷⴷⵍ ⴰⵎⵇⵇⵔⴰⵏ. ⵙ ⵓⵢⴰ ⴰⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ ⴷⴰ ⵜⵜ ⵉⵜⵜⵍⴰⵖⵉ ⴰⴷ ⵜⴳⴳ ⵜⴰⵎⴰⵙⴰⵢⵜ ⵏⵏⵙ ⵜⵓⵙⵎⵉⴷⵜ ⴳ ⵓⵙⵡⵉⵔ ⴰⴷ.
ⴰⵎⵙⴰⵙⴰ ⵅⴼ ⵜⵡⵉⵍⴰ ⵜⴰⵎⵣⵡⴰⵔⵓⵜ ⵏ ⵜⵎⵙⵙⴽⵜⵉⵜ ⵏ ⵓⴽⴰⴱⴰⵔ ⵅⴼ ⵡⴰⵍⵍⴰⵙ ⵏ ⵓⵙⵍⴳⵏ ⴰⵏⴱⴽⴰⴹ
ⴳ ⵜⵙⴳⴰ ⵢⴰⴹⵏ, ⵉⴳⴳ ⵓⵎⴰⵔⵉⵙ ⴰⵙⵔⵜⴰⵏ ⵜⴰⵖⵓⵔⵉ, ⵓⵎⵙⴰⵙⴰ ⵅⴼ ⵓⵙⵖⵏⵓ ⴰⵎⵣⵡⴰⵔⵓ ⵏ ⵜⵎⵙⵙⴽⵜⵉⵜ ⵏ ⵓⴽⴰⴱⴰⵔ ⵅⴼ ⵡⴰⵍⵍⴰⵙ ⵏ ⵓⵙⵍⴳⵏ ⴰⵏⴱ, ⴷⴷⴰⵡ ⵏ ⵢⴰⵏ ⵓⴼⵙⴰⵔ ⵉⵜⵜⵓⵙⵏⴽⴰⴷⵏ ⴳ ⵓⵙⵏⵜⵍ ⴰⴷ, ⴷ ⵜⵙⵙⵏⵜⵉ ⵜⵎⵙⵙⴽⵜⵉⵜ ⴰⴷ ⵙ ⵓⵙⵍⵉⴳ ⴳ ⵜⵙⴰⵖⵓⵍⵜ ⵜⴰⵎⴰⴹⵍⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵙⴳ ⵜⵙⴰⵖⵓⵍⵜ ⵜⴰⵎⵏⴹⴰⵡⵜ ⵜⴰⵏⴰⵎⵓⵔⵜ, ⴷ ⵉⵙⵎⵉⴳⵉⵍⵏ ⵏ ⵓⵎⵉⵔⵓ ⵏ ⵓⵙⵖⴷ ⵏ ⵓⵏⴰⴳⵔⴰⵡ ⵏ ⵜⵣⵔⴼⵜ, ⴷ ⵙⴳ ⵉⵏⵇⵇⵉⵙⵏ ⴷ ⵜⴰⵏⵏⴰⵢⵉⵏ ⵏ ⵜⵎⵔⵙⴰⵍ ⵜⵉⵎⵏⴹⴰⵡⵉⵏ ⵜⵉⵏⴰⵎⵓⵔ, ⴰⵡⴷ ⵉⵎⵓⵔⵙⵏ ⵉⵣⵔⴼⴰⵏⵏ ⴷ ⵡⵉⵏ ⵍⴼⵉⵇⵀ ⵏⵏⵓⵕⵥⵎⵏⵉⵏ, ⴷ ⵙⴳ ⵉⵜⵉⴳⴳⵏ ⴷ ⵉⵎⵏⵣⴰⵢⵏ ⵏ ⵓⴽⴰⴱⴰⵔ ⵏ ⵓⴼⴰⵔⴰ
ⴷ ⴰⵔ ⵉⵥⵕⵕⴰ ⵓⵎⴰⵔⵉⵙ ⴰⵙⵔⵜⴰⵏ ⵎⴰⵙⴷ ⴰⵍⵍⴰⵙ ⵉⴷⵔⴰⵏ ⴰⵖⵣⵓⵔⴰⵏ ⵉ ⵓⵙⵍⴳⵏ ⴰⵏⴱⴽⴰⴹ ⵖⵓⵔⵙ ⵢⴰⵜ ⵜⵉⵏⴷⵉ ⵜⴰⵏⴰⵎⵓⵏⵜ ⵢⴰⵜⵜⵓⵢⵏ, ⴰⵔ ⵉⵜⵜⴰⵏⵏⴰⵢ ⵎⴰⵙⴷ ⴰⵙⵖⴷ ⵉⵇⵇⴰⵏ ⵜ ⵉⴷ ⴰⴷ ⵉⴱⴷⴷ ⵅⴼ ⵓⵙⵉⵔⵉⵡ ⵏ ⵓⵙⴰⵢⵔⵓⵔ ⵏ ⵜⴷⵔⴼⵉⵏ ⴷ ⵉⵣⵔⴼⴰⵏ, ⴷ ⵜⵏⴽⵔⴰ ⵙ ⵜⴳⴷⵓⵜ ⵏⴳⵔ ⵓⵔⴳⴰⵣ ⴷ ⵜⵎⵖⴰⵔⵜ, ⴷ ⵅⴼ ⵉⵎⵏⵣⴰⵢⵏ ⵏ ⵜⵣⵔⴼⵜ ⴷ ⵓⵙⵓⵎⵓ, ⵙ ⵎⴽⵍⵍⵉ ⴷ ⵉⵎⵙⴰⵙⴰⵏ ⴰⴽⴷ ⵜⴰⵎⵏⴹⴰⵡⵜ ⴷ ⵜⵎⵢⴰⵇⵇⴰⵏⵉⵏ ⴷ ⵉⵙⴱⴷⴰⴷ ⵉⵎⴰⴹⵍⴰⵏⵏ ⵏ ⵜⴷⵔⴼⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⵖⴰⵔⴰⵙⵜ ⵏ ⵜⵎⵔⴰⵔⵓⵜ ⵉ ⵉⵙⵏⴼⵍⵏ ⵉⵏⴰⵎⵓⵏⵏ ⴷⵔⴰⵏⵉⵏ, ⵎⴽⵍⵍⵉ ⵉⵥⵕⵕⴰ ⵎⴰⵙⴷ ⴰⵙⵔⵣ ⵏ ⵜⵎⴰⵣⵉⵔⵜ ⵏⵏⵖ ⴳ ⵓⵏⴰⴳⵔⴰⵡ ⴰⵏⴱⴽⴰⴹ ⴰⵜⵔⴰⵔ ⵉⵏⵏⵓⵕⵥⵎⵏ, ⴷⴰ ⵉⵙⵙⴷⵓⵙ ⵜⴰⵣⵔⴼⵜ ⵜⴰⵏⴱⴽⴰⴹⵜ ⵜⴰⵎⵔⵏⵉⵡⵜ ⴷ ⵉⵜⵜⵎⵙⴰⵙⴰⵏ ⴷ ⵉⵙⵏⴼⵍ, ⵢⴰⵡⵙ ⴳ ⵓⵙⴷⵓⵙ ⵏ ⵜⵓⵚⴽⴰ ⵜⴰⴷⵉⵎⵓⵇⵕⴰⵟⵉⵜ ⵜⴰⵏⴰⵎⵓⵔⵜ.
ⴷ ⴳⵜⵙⵉⵍⴰ ⵏ ⵓⵙⵖⵏⵓ ⵏ ⵜⵎⵙⵙⴽⵜⵉⵜ ⵏ ⵓⴽⴰⴱⴰⵔ ⵅⴼ ⵡⴰⵍⵍⴰⵙ ⵏ ⵓⵙⵍⴳⵏ ⴰⵏⴱⴽⴰⴹ, ⵉⵖⵜⵙ ⵓⵎⴰⵔⵉⵙ ⴰⵙⵔⵜⴰⵏ ⴰⵙⵏⵎⴰⵍⴰ ⵏ ⵜⵓⴳⵜ ⵏ ⵉⵏⵎⵓⵇⵇⴰⵔⵏ ⵅⴼ ⵜⵎⵙⴰⵔⵜ ⴰⴷ.
ⴰⵙⵙⵔⵖⵓⴷ ⴷ ⵓⵙⵎⵖⵔ ⵙ ⵓⵎⵓⵔⵙ ⵏ ⵓⴱⵔⴳⵔⴰⵡ ⴰⵏⴰⵎⵓⵔ ⵡⵉⵙⵙ ⵚⴹⵉⵚ ⵏ ⵜⵎⴰⴷⴷⴰⵙⵜ ⵏ ⵟⴰⵍⴰⵢⵄ ⵏ ⵡⴰⵣⵣⴰⵏ ⵏ ⵍⵎⵖⵔⵉⴱ.
ⴷⴰ ⵉⵙⵙⵏⴽⴰⴷ ⵓⵎⴰⵔⵉⵙ ⴰⵙⵔⵜⴰⵏ ⴰⵙⵙⵔⵖⵓⴷ ⵏⵏⵙ ⵉⵥⵉⵍⵏ ⵉ ⵜⵎⴰⴷⴷⴰⵙⵜ ⵏ ⵟⴰⵍⴰⵢⵄ ⵏ ⵡⴰⵣⵣⴰⵏ ⵏ ⵍⵎⵖⵔⵉⴱ, ⵙ ⵜⵎⵍⴷⴰ ⵏ ⵓⵎⵓⵔⵙ ⵏ ⵓⴱⵔⴳⵔⴰⵡ ⵏⵏⵙ ⴰⵏⴰⵎⵓⵔ ⵡⵉⵙⵙ ⵚⴹⵉⵚ, ⴳ ⵉⵙⵡⵉⵔⵏ ⴰⴽⴽⵯ, ⵉⴳⴳ ⴰⵙⵎⵖⵔ ⵏⵏⵙ ⵙ ⵡⴰⵏⵙⴰ ⴷ ⵓⵙⴰⴽⴰ ⵏ ⵜⵎⴰⴷⴷⴰⵙⵜ ⴰⴷ ⵉⴹⴼⵕⵏ ⵉ ⵓⴽⴰⴱⴰⵔ, ⴷ ⵜⵡⵉⵙⵉⵡⵉⵏ ⵏⵏⵙ ⵜⵉⵎⵓⴼⴰⵢⵉⵏ ⴳ ⵢⵉⴳⵔ ⵏ ⵜⴰⵡⵉⵜ ⴳ ⵜⴰⵣⵣⴰⵏⵉⵏ ⴷ ⵓⵙⵎⵓⵜⵜⴳ ⵏⵏⵙⵏ, ⴷ ⵜⵎⵙⴰⵔⵉⵏ ⵏ ⵉⵥⵍⵉⵏ ⵙ ⵡⴰⵣⵣⴰⵏ ⴳ ⵉⵎⵏⵉⴷⵏ ⵏⵏⵙ ⴰⴽⴽⵯ ⴷ ⵜⵙⴳⴳⵉⵡⵉⵏ ⵏⵏⵙ.
ⵙ ⵜⵎⵍⴷⴰ ⴰⴷ, ⵉⵥⵍⵉ ⵓⵎⴰⵔⵉⵙ ⴰⵙⵔⵜⴰⵏ ⵢⴰⵏ ⵓⵙⵏⵓⴱⴳ ⴰⵎⵇⵇⵔⴰⵏ ⵉ ⵓⵎⴷⴷⴰⴽⴽⵍ ⵎⵓⵃⵎⵎⴰⴷ ⵃⴰⵊⵡⵉ ⵉ ⵓⵙⵙⵔⵖⵓⴷ ⵏⵏⵙ ⵅⴼ ⵓⵙⵜⴰⵢ ⵏⵏⵙ ⴰⵏⵙⵙⵉⵅⴼ ⴰⵎⴰⵢⵏⵓ ⵉ ⵜⵎⴰⴷⴷⴰⵙⵜ ⴳ ⵡⴰⵏⵙⴰ ⵏ ⵓⵎⴷⴷⴰⴽⴽⵍ ⵕⴰⵛⵉⴷ ⵔⵓⴽⴱⴰⵏ ⴷⴰ ⵎⵉ ⵉⵙⵙⵏⴽⴷ ⵓⴽⴰⴱⴰⵔ ⴰⵙⵎⵖⵔ ⵢⴰⵜⵜⵓⵢⵏ ⵅⴼ ⵜⵣⵎⵎⴰⵔ ⵏⵏⵙ ⵜⵉⵎⵇⵇⵔⴰⵏⵉⵏ ⴰⴽⵓⴷ ⵍⵍⵉ ⵢⵓⵎⵥ ⵜⴰⵎⴰⵙⴰⵢⵜ ⵏ ⵜⵎⴰⴷⴷⴰⵙⵜ ⴰⴷ ⵉⵙⴳⴳⵯⴰⵙⵏ ⵣⵔⵉⵏⵉⵏ.
ⴰⵖⴰⵡⴰⵙ ⵏ ⵜⵡⵓⵔⵉ ⵏ ⵜⴼⵔⴽⵜ ⴷ ⵢⵓⵙⴰⵏ
ⵎⴰⴷ ⵉⵥⵍⵉⵏ ⵙ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵜⴼⵔⴽⵜ ⴷ ⵢⵓⵙⴰⵏ, ⵉⵙⵜⵉ ⵓⵎⴰⵔⵉⵙ ⴰⵙⵔⵜⴰⵏ ⵢⴰⵜ ⵜⴰⵔⴰⴱⴱⵓⵜ ⵏⴳⵔ ⵉⴳⵎⴰⵎⵏ ⵏⵏⵙ ⴰⴼⴰⴷ ⴰⴷ ⴷ ⵃⵉⵢⵢⵍⵏ ⵢⴰⵜ ⵜⵡⴰⵍⵉⵜ ⴷ ⵓⵖⴰⵡⴰⵙ ⴷ ⵉⵙⵏⵎⴰⵍⴰⵜⵏ ⵉⵥⵍⵉⵏ ⵙ ⵓⵙⴼⵓⴳⵍⵓ ⴷⴰ ⵔⴰⴷ ⵉⵙⵏⵎⴰⵍⴰ ⵢⴽⴰⴱⴰⵔ ⵙ ⵜⵎⵍⴷⴰ ⵏ ⵓⴽⵜⵜⴰⵢ ⵡⵉⵙⵙ ⴽⴽⵓⵥ ⵉⴳⵏⴰⵔⵏ ⵏ ⵓⵙⵙⵏⵜⵉ ⵏⵏⵙ, ⵎⴽⵍⵍⵉ ⵉⵙⴷⴷⵉⴷ ⵅⴼ ⵜⵖⵓⵔⵉ ⵏⵏⵙ ⵉ ⵡⴰⵢⵢⴰⵡⵏ ⴰⴽⴽⵯ ⴷ ⵜⵎⴰⴷⴷⴰⵙⵉⵏ ⵏ ⵓⴽⴰⴱⴰⵔ, ⵃⵎⴰ ⴰⴷ ⴳⴳⵏ ⵜⵎⵢⴰⴷⴰⵙⵉⵏ ⴷ ⵉⵇⵇⴰⵏ ⴰⴼⴰⴷ ⴰⴷ ⵙⵏⵎⴰⵍⴰⵏ ⵉⵏⵎⵓⵇⵇⴰⵔⵏ ⴷ ⵉⵎⵓⵙⵙⵓⵜⵏ ⴷ ⵜⵉⵏⴰⵡⵉⵏ, ⵅⴼ ⵉⵙⵏⵜⴰⵍ ⵉⵎⵏⴰⵡⴰⵢⵏ, ⵎⴽⵍⵍⵉ ⵉⴳⴰⵏ ⵜⴰⵎⵢⵓⵔⵜ ⴳ ⵡⴰⵢⵢⵓⵔ ⵏ ⵕⵎⴹⴰⵏ ⴰⵎⴱⴰⵔⴽⵉ.