ⴰⵙⵉⵡⴹ ⴰⵏⵖⵎⴰⵙ ⵅⴼ ⵓⴳⵔⴰⵡ ⵏ ⵓⵎⴰⵔⵉⵙ ⴰⵙⵔⵜⴰⵏ ⵏ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ ⵏ ⵡⴰⵙⵙ ⵏ ⴰⵙⵉⵏⴰⵙ 11 ⵉⴱⵔⵉⵔ 2023
ⴰⵙⵎⵎⴳⵏⵜ ⵏ ⵜⴱⵖⵓⵔⵉⵏ ⵏ ⵉⴳⵍⵍⵉⵏ ⵏ ⵅⴰⵍⵉⴷ ⵏⵏⴰⵚⵉⵔⵉ ⵜⴰⵎⵍⵍⴰ ⵏ ⵕⴱⴱⵉ ⴼⵍⵍⴰⵙ.
ⴳ ⵓⵎⵣⵡⴰⵔⵓ ⵏ ⵓⴳⵔⴰⵡ ⵏⵏⵙ, ⵏ ⵡⴰⵙⵙ ⵏ ⴰⵙⵉⵏⴰⵙ 11 ⵉⴱⵔⵉⵔ 2023, ⵉⴱⴷⴷ ⵓⵎⴰⵔⵉⵙ ⴰⵙⵔⵜⴰⵏ ⵏ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ ⵜⵉⴱⵖⵓⵔⵉⵏ ⵏ ⵓⵊⵎⵉⴹ ⵏ ⵓⵎⵓⵔ ⴷ ⵓⴽⴰⴱⴰⵔ, ⵉⴳⵍⵍⵉⵏ ⵅⴰⵍⵉⴷ ⵏⵏⴰⵚⵉⵔⵉ, ⵜⴰⵎⵍⵍⴰ ⵏ ⵕⴱⴱⵉ ⴼⵍⵍⴰⵙ, ⴷ ⴰⵢⵍⵍⵉ ⴷ ⵉⴼⵍ ⵏ ⵜⵡⴳⴳⴰⴹ ⵜⵉⵎⵇⵇⵔⴰⵏⵉⵏ ⴳ ⵓⵙⴰⴽⴰ ⵏⵏⵙ ⴰⵎⵖⵏⴰⵙ ⴰⴽⵙⵡⴰⵜ ⵖⵓⵔ ⵍⵍⴰⵏⵜ ⵜⵡⵡⵓⵔⴰ ⵜⵉⵎⵏⴰⵡⴰⵢⵉⵏ. ⵎⴽⵍⵍⵉ ⵉⵙⵙⵏⴽⴷ ⵓⵎⴰⵔⵉⵙ ⴰⵙⵔⵜⴰⵏ ⴰⵙⵎⵖⵔ ⵏⵏⵙ ⵢⴰⵜⵜⵓⵢⵏ ⴷ ⵓⵙⵏⵉⵎⵎⵔ ⵏⵏⵙ ⴰⵎⵇⵇⵔⴰⵏ ⵉ ⵜⴱⵔⴰⵜ ⵜⴰⴳⵍⴷⴰⵏⵜ ⵜⴰⵏⴰⴼⵍⵍⴰⵜ ⵏ ⵓⴼⵛⴰⴷ ⵅⴼ ⵜⵎⵜⵜⴰⵏⵜ ⵏ ⵓⵙⵎⵓⵏ ⵅⴰⵍⵉⴷ ⵏⵏⴰⵚⵉⵔⵉ, ⵉⴷⴷⵖ ⴰⵢⵍⵍⵉ ⴳⵉⵙ ⵉⵍⵍⴰⵏ ⵏ ⵉⵡⵏⵏⵉⵜⵏ ⴰⵜⵜⵓⵢⵏⵉⵏ ⵥⵉⵍⵏⵉⵏ.
ⵉⴼⵍⴷ ⵓⴼⵓⴹ ⵏ ⵉⴳⵍⵍⵉⵏ ⵏ ⵅⴰⵍⵉⴷ ⵏⵏⴰⵚⵉⵔⵉ ⵢⴰⵜ ⵜⴳⵓⴹⵉ ⵉⴷⵔⴰⵏ ⴷ ⵓⵖⵉⵍⵓⴼ ⵎⵇⵇⵓⵔⵏ ⴳ ⵢⵉⵎⴰⵏ ⵏ ⴰⵢⵜ ⵜⵡⵊⴰ ⵜⴰⵎⵥⵢⴰⵏⵜ, ⴷ ⵜⵎⴷⴷⵓⴽⴽⴰⵍ ⵏⵏⵙ ⴷ ⵉⵎⴷⴷⵓⴽⴽⴰⵍ ⵏⵏⵙ ⴷ ⵉⵙⵎⵓⵏⵏ ⵏⵏⵙ ⴷ ⵎⴰⵕⵕⴰ ⵉⵏⵎⵓⵔⵉⵜⵏ ⴷ ⵜⵏⵎⵓⵔⵉⵜⵉⵏ, ⴷ ⵔⴰⴷ ⴱⴷⴷⴰ ⵜⴷⴷⵔ ⵜⵎⴽⵜⵉⵜ ⵏⵏⵙ ⵏⴳⵔ ⴰⵢⵜ ⵜⵡⴰⵛⵓⵏⵜ ⵏⵏⵙ, ⴰⵡⴷ ⵏⴳⵔ ⵜⵎⴷⴷⵓⴽⴽⴰⵍ ⵏⵏⵙ ⴷ ⵉⵎⴷⴷⵓⴽⴽⴰⵍ ⵏⵏⵙ, ⵉⴳ ⵜⴰⵎⴰⵜⴰⵔⵜ ⵏ ⵜⵖⵏⵙⴰ ⵜⴰⴷⵓⵙⴰⵏⵜ, ⵉ ⵜⵏⴰⴼⵓⵜ ⵏ ⵉⵙⵏⴰⵔⴰⵜⵏ ⵏ ⵓⵎⵓⵔ ⴷ ⵓⴳⴷⵓⴷ, ⴷ ⵉⵜⵉⴳⴳⵏ ⴷ ⵉⵏⵓⵔⴰⵣ ⵍⵍⵉ ⵎⵉ ⵉⵙⴼⴰⵙⴽⴰ ⵉⴳⵍⵍⵉⵏ ⵜⵓⴷⵔⵜ ⵏⵏⵙ.
ⵜⴰⵙⵓⵍⴰⵏⵜ ⵏ ⵍⵖⵍⴰ ⴳ ⵜⵏⴰⴱⴱⴰⵢⵜ ⵏ ⵜⵎⴳⴳⵉⵢⵉⵏ ⵜⵓⵏⴱⵉⴹⵉⵏ
ⵉⵥⵍⵉ ⵓⵙⵉⵔⴰ ⴰⵙⵔⵜⴰⵏ ⴰⴽⵓⴷ ⴰⵎⵇⵇⵔⴰⵏ ⵏ ⵓⴳⵔⴰⵡ ⵏⵏⵙ ⵉ ⵜⵖⵓⵔⵉ ⵏ ⵜⵎⵙⴰⵔⵉⵏ ⵜⵉⵙⵔⵜⴰⵏⵉⵏ ⴷ ⵜⵏⴰⵎⵓⵏⵉⵏ ⴷ ⵜⴷⵎⵙⴰⵏⵉⵏ ⴳ ⵜⵎⴰⵣⵉⵔⵜ ⵏⵏⵖ, ⵙⵍⴰⵡⴰⵏ ⴰⴽⴽⵯ ⵜⴰⵜⵜⵓⵢⵜ ⵏ ⵡⴰⵜⵉⴳⴳⵏ ⴷ ⵓⵖⵓⵍ ⴰⵎⵇⵇⵔⴰⵏ ⵏ ⵜⵣⵎⵔⵜ ⵜⴰⵎⵙⵖⵉⵡⵜ ⵏ ⵜⵡⵊⵉⵡⵉⵏ ⵜⵉⵎⵖⵔⵉⴱⵉⵢⵏ, ⵎⵇⵇⴰⵔ ⵉⵍⵍⴰ ⵢⴰⵏ ⵓⵖⵓⴷⵓ ⵉⴼⵙⵙⵓⵙⵏ ⴳ ⵡⴰⵜⵉⴳⴳⵏ ⵏ ⴽⵔⴰ ⵏ ⵜⵖⴰⵡⵙⵉⵡⵉⵏ ⵜⵉⵙⵙⵓⵎⵔⴰ, ⴰⵎⵔ ⴰⴷ ⵉⵍⵉⵏⵜ ⴳ ⵡⴰⴷⴷⴰⴷ ⵓⵏⵣⵉⵍ.
ⵉⴱⴷⴷ ⵓⵍⴰ ⵓⵎⴰⵔⵉⵙ ⴰⵙⵔⵜⴰⵏ ⵅⴼ ⵜⵙⵓⵍⴰⵏⵜ ⵏ ⵜⴽⵔⵔⴰⵢⵜ ⴳ ⴷⴷⵔⵏⵜ ⵜⵏⵎⵓⵔⵉⵜⵉⵏ ⴷ ⵉⵏⵎⵓⵔⵉⵜⵏ ⵙ ⵓⵙⵔⴰⴳ ⵏ ⵜⴰⵙⵙⴰⵙⵜ ⵏ ⵍⵖⵍⴰ, ⵙⵍⴰⵡⴰⵏ ⴰⴽⴽⵯ ⴳ ⵡⴰⵢⵢⵓⵔ ⵏ ⵕⵎⴹⴰⵏ, ⴳ ⵡⴰⴽⵓⴷ ⵍⵍⵉⴳ ⵓⵔ ⵍⵍⵉⵏⵜ ⵜⵎⴳⴳⵉⵢⵉⵏ ⵜⵓⵏⴱⵉⴹⵉⵏ ⴷⴰⵔ ⴰⴷⵔⵉⵣ ⴰⵎⴰⵍⴰⵡ ⴰⵏⵉⵍⴰⵡ. ⵎⴽⵍⵍⵉ ⵜⴱⴷⴷ ⵅⴼ ⵉⵡⵏⵏⵉⵜⵏ ⵓⵣⵔⵉⴼⵏ ⵎⵏⴳⴰⵍ ⵏ ⵡⴰⴷⴷⴰⴷⵏ ⴰⴷ, ⴰⵎ ⴰⵢⵍⵍⵉ ⵉⵙⴰⵔⵏ ⴰⵙⵉⴹⵢⴰⵙ ⵉⵣⵔⵉⵏ ⴳ ⵜⵓⴳⵜ ⵏ ⵜⵖⵔⵎⵉⵏ ⵏ ⵜⵎⴰⵣⵉⵔⵜ ⵏⵏⵖ.
ⵜⴰⴱⵔⴰⵜ ⵉⵕⵥⵎⵏ ⵉ ⵓⵏⵙⵙⵉⵅⴼ ⵏ ⵜⵏⴱⴰⴹⵜ: ⵜⴰⵎⵙⴽⵉⵔⵜ ⵜⴰⴷⵉⵎⵓⵇⵕⴰⵟⵉⵜ ⵢⴰⵜⵜⵓⵢⵏ ⴳ ⵓⵙⴰⵜⵉ ⵏ ⵜⵎⵏⴹⴰⵡⵜ, ⵉⵜⵜⵇⵍⵏ ⵙ ⵜⵎⵔⴰⵔⵓⵜ ⵅⴼ ⵜⵓⵎⴰⵢⵉⵏ ⵏⵏⵙ
ⴳ ⵜⵙⴳⴰ ⵢⴰⴹⵏ, ⵉⵙⵉⵡⵍ ⵓⵎⴰⵔⵉⵙ ⴰⵙⵔⵜⴰⵏ ⵅⴼ ⵜⴱⵔⴰⵜ ⵉⵕⵥⵎⵏ ⴷⴰ ⵢⵓⵣⵏ ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵍⵍⵉ ⵓⵔ ⵉⵔⴰⵔ, ⴰⵔ ⵖⵉⵍⴰⴷ, ⵅⴼ ⵜⵓⵎⴰⵢⵉⵏ ⵏⵏⵙ ⵏ ⵜⵖⴹⴼⵜ ⴷ ⵜⵙⵓⵎⵔⵜ.
ⵎⴽⵍⵍⵉ ⵉⵙⴷⴷⵉⴷ ⵎⴰⵙⴷ ⵜⴰⴱⵔⴰⵜ ⴰⴷ ⵉⵕⵥⵎⵏ ⴷⴰ ⵢⵓⵣⵏ ⵓⴽⴰⴱⴰⵔ ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵓⵔ ⴷ ⴽⵔⴰ ⵏ ⵢⴰⵏ ⵢⴰⴹⵏ, ⵜⴳⴰ ⵢⴰⵜ ⵜⵎⵙⴽⵉⵔⵜ ⵜⴰⴷⵉⵎⵓⵇⵕⴰⵟⵉⵜ ⵢⴰⵜⵜⵓⵢⵏ, ⵜⴰⴼⴳⵔⴰⵛⵜ ⴷ ⵜⵎⵙⵜⴳⴳⴰⵔⵜ, ⴳ ⵓⵙⴰⵜⵉ ⵏ ⵜⵉⵍⴰⵍ ⵉⵥⵍⵉⵏ ⴳ ⵜⵎⵏⴹⴰⵡⵜ ⵙ ⵉⴽⴰⴱⴰⵔⵏ ⵉⵙⵔⵜⴰⵏⵏ ⴷ ⵉⵣⵔⴼⴰⵏ ⵏ ⵉⴽⴰⴱⴰⵔⵏ ⵏ ⵜⵓⵣⵍⵜ, ⵎⴽⵍⵍⵉ ⴷ ⵜⵉⵡⵉ ⵜⵎⵏⴹⴰⵡⵜ, ⵙⵍⴰⵡⴰⵏ ⴰⴽⴽⵯ ⴳ ⵢⵉⵍⵉⵔ ⵏⵏⵙ ⵡⵉⵙⵙ ⵙⴰ ⴷ ⵡⵉⵙⵙ ⵎⵔⴰⵡ.
ⴷ ⵙ ⵜⵓⴳⴳⵓⴳⵜ ⵅⴼ ⵜⵎⵔⴰⵔⵓⵜⵉⵏ ⵓⵔ ⵉⵍⵍⵉⵏ ⴳ ⵓⵙⵡⵉⵔ, ⴷⴰ ⵉⵙⵜⵉⵏ ⴰⵏⵣⵣⵓⵖ ⵅⴼ ⵉⵡⵔⵉⴽⵏ ⵙ ⵜⵎⴰⵎⴽⵉⵏ ⴱⴰⵀⵔⴰ ⵅⵛⵏⵉⵏ, ⴳ ⵓⴷⵖⴰⵔ ⵏ ⵓⵙⵏⵎⵣⴰⵣⴰⵍ ⵏ ⵉⵎⵏⴰⴷⵏ ⴷ ⵉⵙⵡⵉⵏⴳⵉⵎⵏ ⴷ ⵓⵙⴰⵜⵜⵓⵢ ⵏ ⵓⵎⵙⴳⴷⴰⵍ ⴰⴳⴷⵓⴷⴰⵏ ⵙ ⴰⵢⵍⵍⵉ ⵙ ⵜⵙⵖⴰⵡⵙⴰ ⵜⵎⵙⴽⵉⵔⵜ ⵜⴰⵙⵔⵜⴰⵏⵜ ⵉⵣⴷⴷⴳⵏ ⵙⴳ ⵓⵣⵔⴰⴽ ⴷ ⵜⵖⴰⵔⵉⵡⵉⵏ. ⴷⴰ ⵉⵙⵎⴰⵢⵏⵓ ⵓⵎⴰⵔⵉⵙ ⴰⵙⵔⵜⴰⵏ ⴰⵙⴷⴷⵉⴷ ⵏⵏⵙ ⵎⴰⵙⴷ ⴰⴷⴷⴰⴷⵏ ⵉⵏⴰⵎⵓⵏⵏ ⵉⴷⵖⵉⵜⵏ ⵙⵖⴰⵡⵙⴰⵏ ⵙ ⵓⴼⵓⵖ ⵏ ⵜⵏⴱⴰⴹⵜ ⵙⴳ ⵉⴼⵙⵙⵉ ⵏⵏⵙ ⵓⵣⴷⵉⵔ, ⴷ ⵓⵎⵔⴰⵔⴰ ⴰⴽⴷ ⵉⵇⵇⵍⵏ ⵏ ⵜⵏⵎⵓⵔⵉⵜⵏ ⴷ ⵉⵏⵎⵓⵔⵉⵜⵏ, ⴷ ⵜⵏⴽⴷⴰ ⵏ ⵜⵎⵔⴰⵔⵓⵜ ⵅⴼ ⵜⵙⵓⵎⴰⵔ ⴷ ⵉⵙⵏⴼⵍ ⵍⵍⵉ ⴷ ⵜⵉⵡⵉ ⵜⴱⵔⴰⵜ ⵉⵕⵥⵎⵏ ⵏ ⵓⴽⴰⴱⴰⵔ ⵏⵏⵖ, ⵙ ⵓⵙⴷⴷⵉⴷ ⵏⵉⵖ ⵜⵉⴱⴰⵡⵜ. ⴷ ⵉⵇⵇⴰⵏ ⴷ, ⴰⵙⵙ ⴰⴷ, ⴰⴷ ⵜⴳⴳ ⵜⵏⴱⴰⴹⵜ ⵜⵉⵖⵜⴰⵙⵏ ⵜⵉⴷⵜ, ⵜⵉⵏⴰⵍⵉⵡⵉⵏ ⵏ ⵜⵉⴷⵓⵙⴰⵏⵉⵏ ⴰⴼⴰⴷ ⴰⴷ ⵜⴼⵔⴳ ⵜⴰⵣⵎⵔⵜ ⵜⴰⵎⵙⵖⵉⵡⵜ ⵏ ⵉⵎⵖⵔⵉⴱⵉⵢⵏ ⵜⴰⵔⵉ ⵜⴰⵏⴼⵔⵓⵜ ⵜⴰⵏⴰⵎⵓⵏⵜ.
ⴰⵙⵅⵛⵏ ⴰⵎⵇⵇⵔⴰⵏ ⵏ ⵜⴰⴷⵓⵜ ⵜⴰⵚⵀⵢⵓⵏⵉⵜ ⵅⴼ ⵍⵇⵓⴷⵙ ⴷ ⵜⵎⵣⴳⵉⴷⴰ ⵜⴰⵎⵓⵣⵣⵓⵔⵜ
ⴳ ⵓⵙⵡⵉⵔ ⵢⴰⴹⵏ, ⵉⵙⵉⵡⵍ ⵓⵎⴰⵔⵉⵙ ⴰⵙⵔⵜⴰⵏ ⵅⴼ ⵜⵎⵙⴰⵔⵉⵏ ⵜⵉⵎⴰⵢⵏⵓⵜⵉⵏ ⵜⵉⵎⵉⵣⵉⵜⵏ ⴳ ⵓⴱⴰⵔⴰⵣ ⴰⴼⵉⵍⵉⵚⵟⵉⵏⵉ. ⴷ ⵉⵙⴷⴷⵉⴷ ⴳ ⵓⵙⴽⴽⵉⵏ ⴰⴷ ⵅⴼ ⵜⵓⵎⴰⵢⵉⵏ ⵏ ⵓⵙⵎⵎⴰⵍ ⵏⵏⵙ ⴰⵍⴳⴳⴰⵔⵓ ⴷ ⵉⴼⴼⵖⵏ ⴳ ⵡⴰⵙⵙ ⵏ 05 ⵉⴱⵔⵉⵔ 2923, ⵎⴽⵍⵍⵉ ⵉⵙⵎⴰⵢⵏⵓ ⴰⵙⵙⵅⵛⵏ ⵏⵏⵙ ⵉ ⵜⴰⴷⵓⵜ ⵜⴰⴱⴽⴽⴰⴹⵜ ⴷⴰ ⵉⵜⵜⴳⴳ ⵓⵎⴷⴷⵓⵔⵓⵢ ⴰⵚⵀⵢⵓⵏⵉ ⴳ ⵍⵇⵓⴷⵙ ⴷ ⵜⵎⵣⴳⵉⴷⴰ ⵜⴰⵎⵓⵣⵣⵓⵔⵜ. ⵉⴳⴳ ⵎⴰⵢⴰⵏ ⴷ ⵜⵖⵡⵡⴰⵖⵜ ⴷ ⵓⵙⵏⵓⵃⵢⵓ ⴷ ⵜⵕⵥⵉ ⵏ ⵉⵙⵍⴳⵏⵏ ⴰⴽⴽⵯ ⵉⴳⵔⴰⵖⵍⴰⵏ ⴷ ⵉⵏⴼⴳⴰⵏⵏ, ⴷ ⵓⵡⵜⵜⴰⵙ ⴰⵅⵛⵛⴰⵏ ⵖⵔ ⴰⵙⵏⴼⵍ ⵏ ⵡⴰⴷⴷⴰⴷ ⴰⵎⵣⵔⴰⵢ ⵏ ⵍⵇⵓⴷⵙ ⴷ ⵉⴳⵯⴷⴰⵍⵏ ⵏⵏⵙ.
ⵉⴷⴷⵖ ⴷⴰ ⵉⵙⵡⵓⵍⵓ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ ⵉⵙⵔⴰⵢⵉⵍ ⵜⴰⵎⴰⵙⴰⵢⵜ ⵏ ⴰⵢⵍⵍⵉ ⴳ ⵜⵙⴰⵔⴳ ⵜⵏⴱⴰⴹⵜ ⵜⴰⵚⵀⵢⵓⵏⵉⵜ, ⴷⴰ ⵉⵜⵜⵍⴰⵖⵉ ⴰⴷ ⵢⵉⵍⵉ ⵓⴼⵔⴰⴳ ⴰⴳⵔⴰⵖⵍⴰⵏ ⵉ ⵓⴳⴷⵓⴷ ⴰⴼⵉⵍⵉⵚⵟⵉⵏⵉ. ⵎⴽⵍⵍⵉ ⵉⵜⵜⵙⴷⴷⵉⴷ ⴰⴹⴼⴼⵓⵕ ⵏ ⵜⵡⵉⵙⵉ ⵏⵏⵙ ⵉ ⵓⴳⴷⵓⴷ ⴰⴼⵉⵍⵉⵙⵉⵟⵉⵏⵉ, ⴰⵔ ⴷ ⵢⴰⵎⵥ ⵉⵣⵔⴼⴰⵏ ⵏⵏⵙ ⴰⴽⵯ ⵉⵏⴰⵎⵓⵔⵏ ⵓⵣⵔⵉⴼⵏ. ⴳ ⵓⵎⵣⵡⴰⵔⵓ ⵏⵏⵙ ⵜⵓⴷⵔⵜ ⵏ ⵓⴼⵔⴰ ⴰⴳⵏⵙⵓ ⵏ ⵓⵡⴰⵏⴽ ⴰⴼⵉⵍⵉⵙⵟⵉⵏⵉ ⴰⵏⵉⵎⴰⵏ ⴳ ⵜⵍⵍⴰ ⵜⵓⴷⵔⵜ ⴷ ⵜⵎⴰⵥⵓⵏⵜ ⵍⵇⵓⴷⵙ.
ⵜⵓⴷⵔⵜ ⵜⴰⴳⵯⵏⵙⴰⵏⵜ ⵏ ⵓⴽⴰⴱⴰⵔ
ⵙ ⵎⴰⴷ ⵉⵥⵍⵉⵏ ⵙ ⵜⵓⴷⵔⵜ ⵜⴰⴳⵯⵏⵙⴰⵏⵜ ⵏ ⵓⴽⴰⴱⴰⵔ, ⵉⵙⵉⵡⵍ ⵓⵎⴰⵔⵉⵙ ⴰⵙⵔⵜⴰⵏ ⴰⵖⴰⵡⴰⵙ ⵏ ⵜⵉⵍⴰⵍ ⵏ ⵕⵎⴹⴰⵏ, ⵉⵙⵙⵏⴽⴷ ⴰⵣⵓⵍ ⴷ ⵓⵙⵎⵖⵔ ⵉ ⵡⴰⵢⵢⴰⵡⵏ ⴰⴽⴽⵯ ⴷ ⵜⵎⴰⴷⴷⴰⵙⵉⵏ ⵏ ⵓⴽⴰⴱⴰⵔ ⴷⴰ ⵉⴳⴳⵏ ⵜⵓⴳⵜ ⵏ ⵜⵎⵢⴰⴷⴷⴰⵙⵉⵏ, ⵙⵏⵎⴰⵍⴰⵏ ⵉⵏⵎⵓⵇⵇⴰⵔⵏ ⵅⴼ ⵉⵙⵏⵜⴰⵍ ⵉⵎⵏⴰⵡⴰⵢⵏ, ⵙⵍⴰⵡⴰⵏ ⴰⴽⴽⵯ ⵜⵉⴷ ⵉⵣⴷⵉⵏ ⴷ ⵡⴰⴷⴷⴰⴷⵏ ⵉⵏⴰⵎⵓⵏⵏ. ⵎⴽⵍⵍⵉ ⵉⵜⵜⵍⴰⵖⵉ ⴰⴹⴼⴼⵓⵕ ⵏ ⵜⵣⵎⵎⴰⵔ ⴰⴷ ⴳ ⵡⴰⵢⵢⵓⵔ ⵏ ⵕⵎⴹⴰⵏ ⴰⵎⴱⴰⵕⴽⵉ ⴷ ⴹⴰⵕⵜ ⵏⵏⵙ, ⴰⴼⴰⴷ ⴰⴷ ⵢⴰⵡⵙ ⵓⴽⴰⴱⴰⵔ ⵏⵏⵖ ⴳ ⵓⵙⵎⵓⵜⵜⴳ ⴷ ⵜⴹⴼⵕⵉ ⵏ ⵉⵙⵓⵜⴰⵔ ⵓⵣⵔⵉⴼⵏ ⵏ ⵜⵏⵎⵓⵔⵉⵜⵉⵏ ⴷ ⵉⵏⵎⵓⵔⵉⵜⵏ, ⵉⵣⴷⵉⵏ ⴷ ⵍⵖⵍⴰ ⵏ ⵡⴰⵜⵉⴳⴳⵏ ⴷ ⵜⴰⵜⵜⵓⵢⵜ ⵏ ⵜⵎⵇⵕⴰⴹ ⴱ ⵜⵓⴷⵔⵜ.
ⵎⴽⴽⵍⵉ ⵉⵙⵙⵎⵖⵔ ⵓⵎⴰⵔⵉⵙ ⴰⵙⵔⵜⴰⵏ ⵙ ⵉⴳⴳⵉⵜ ⵏ ⵉⴳⵔⴰⵡⵏ ⵉⵎⵣⵡⵓⵔⴰ ⵏ ⵜⵓⴳⵜ ⵏ ⵜⵙⵇⵇⵉⵎⵉⵏ ⵜⵉⵙⵖⵏⴰⵏⵉⵏ ⵏ ⵓⴽⴰⴱⴰⵔ. ⴷ ⵉⵙⴷⴷⵉⴷ ⵅⴼ ⵜⵏⴱⵣⴰⵣⵜ ⵏ ⵓⴹⴼⴼⵓⵕ ⵏ ⵜⵡⵓⵔⵉ ⴰⴷ, ⵙ ⵉⴳⴳⵉⵜ ⵏ ⵉⴳⵔⴰⵡⵏ ⵜⵙⵇⵇⵉⵎⵉⵏ ⴰⴽⴽⵯ ⵢⴰⴹⵏ ⴳ ⵓⵣⵎⵣ ⴱⴰⵀⵔⴰ ⵢⴰⵥⵏ.