ⵜⴰⴱⵔⴰⵜ ⵉⵕⵥⵎⵏ ⵙⴳ ⴷⴰⵔ ⵓⵎⴰⵔⵉⵙ ⴰⵙⵔⵜⴰⵏ ⵏ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ ⵉ ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⴰⵏⵙⵙⵉⵅⴼ ⵏ ⵜⵏⴱⴰⴹⵜ
ⵕⵕⴱⴰⴹ, ⴰⵙⵙ ⵏ ⴰⴽⵡⴰⵙ 30 ⵎⴰⵕⵚ 2023
ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ,
ⴰⵣⵓⵍ;
ⵉⴳⴳ ⵓⵎⴰⵔⵉⵙ ⴰⵙⵔⵜⴰⵏ ⵏ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ ⵢⴰⵏ ⵓⴳⵔⴰⵡ ⵓⵙⵍⵉⴷ, ⴰⵙⵙ ⵏ ⴰⴽⵡⴰⵙ 30 ⵎⴰⵕⵚ 2023, ⵉⵥⵍⵉ ⵜ ⵉ ⵡⴰⴷⴷⴰⴷⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⵙⵔⵜⴰⵏⵏ, ⵙⵍⴰⵡⴰⵏ ⴰⴽⴽⵯ ⵜⴰⵎⵙⴰⵔⵜ ⵏ ⵍⵖⵍⴰ ⵏ ⵡⴰⵜⵉⴳⴳⵏ ⴷ ⵓⵖⵓⵍ ⵉⵀⵔⵛⵏ ⵏ ⵜⵣⵎⵔⵜ ⵜⴰⵎⵙⵖⵉⵡⵜ ⵏ ⵉⵎⵖⵔⵉⴱⵉⵢⵏ. ⵙ ⵓⵢⴰ ⵉⵖⵜⵙ ⴰⴷ ⴰⵡⵏ ⵢⴰⵣⵏ, ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵜⴰⴱⵔⴰⵜ ⴰⴷ ⵉⵕⵥⵎⵏ, ⵉⴷⴷⵖ ⴰⵙⵏⵜⵍ ⵢⴰⵖⵓⵍ ⴷ ⵜⴰⵡⵓⵔⵉ ⵉⵣⵣⵉⵡⵣⵏ ⵎⴰⵕⵕⴰ ⵉⵎⵖⵔⵉⴱⵉⵢⵏ ⵉⴳ ⴰⵙⵔⴰⴳ ⵏ ⵓⵏⵣⴳⵓⵎ ⵏⵏⵙⵏ.
ⵙ ⵓⵢⴰ ⵏⵜⵜⵅⵙ ⴰⴷ ⴰⵡⵏ ⵏⵙⵙⵏⴽⴷ ⵉⵎⵏⴰⴷⵏ ⵏⵏⵖ ⴷ ⵜⴰⵏⵏⴰⵢⵉⵏ ⵏⵏⵖ ⴷ ⵜⵙⵓⵎⴰⵔ ⵏⵏⵖ ⴷ ⵉⴷⴷⴰⵏ, ⴰⵏⴰⵔⵓⵣ ⴰⴷ ⴷⵉⵙⵏ ⵜⵎⵔⴰⵔⴰⵎ ⵎⴽⵍⵍⵉ ⵙ ⴷ ⵉⵇⵇⴰⵏ:
- ⴷⴰ ⵉⵜⵜⵣⵎⵎⵉⵎ ⵓⵎⴰⵔⵉⵙ ⴰⵙⵔⵜⴰⵏ ⵏ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ, ⵙ ⵓⵏⵣⴳⵓⵎ ⵉⴳⴳⵓⵜⵏ, ⴰⵙⵙⵉⴼⵙⵓⵙ ⴷⴰ ⵉⴳⴰ ⴰⴼⵔⵉⵙ ⵏ ⵓⵎⵔⴰⵔⴰ ⵓⵔ ⵉⴳⵉⵏ ⴳ ⵜⵎⴰⵙⴰⵢⵜ ⵏ ⵜⵏⴱⴰⴹⵜ ⵏⵏⵓⵏ ⴰⴽⴷ ⵍⵖⵍⴰ ⵉⴳⴳⵓⵜⵏ, ⵍⵍⵉ ⵙⵓⵍ ⵓⵔ ⵉⵥⵥⵉⴹⵕ ⵢⴰⵏ, ⵏ ⵡⴰⵜⵉⴳⴳⵏ ⵏ ⵜⵖⴰⵡⵙⵉⵡⵉⵏ ⵏ ⵡⵓⵜⵛⵉ ⴷ ⵜⵉⵙⵙⵓⵎⵔⴰ, ⴰⵢⵍⵍⵉ ⵉⵜⵜⴳⴳⴰⵏ ⴰⵙⵔⴰⴳ ⵉ ⵜⴰⵜⵜⵓⵢⵜ ⵏ ⵓⵙⵙⵃⵔⴷ ⴰⴳⴷⵓⴷⴰⵏ, ⵙ ⵜⴱⵔⵉⴷⵜ ⵉⵙⵏⴷⵓⴷⵉⵢⵏ ⴰⴼⵔⴰ ⴰⵏⴰⵎⵓⵏ;
- ⴷⴰ ⵉⵙⵙⵅⵛⴰⵏ ⵉⴼⵙⵙⵉ ⵏ ⵜⵏⴱⴰⴹⵜ ⵏⵏⵓⵏ ⴷ ⵓⴱⴷⴰⴷ ⵏⵏⵙ ⴰⴱⴷⴰⴷ ⵏ ⵓⵎⴼⵕⵕⵊ ⴷⴰⵜ ⵏ ⵡⴰⴷⴷⴰⴷⵏ ⴰⴷ ⵉⴳⴳⵏ ⴳⴰⵔ ⵉ ⵡⴰⵏⴰⵡⵏ ⴰⴽⴽⵯ ⵉⵏⴰⵎⵓⵏⵏ, ⵙⵍⴰⵡⴰⵏ ⴰⴽⴽⵯ ⵡⵉⴷ ⵎⵉ ⴷⵔⵓⵙⵏⵜ ⵜⵖⵔⴰⴷ ⴷ ⵡⵉⴷ ⵉⴷⴷⵔⵏ ⴰⴷⴷⴰⴷ ⵏ ⵥⵥⵍⴹ ⴷ ⵜⵍⵎⴹⵉ ⴷ ⵜⵙⴽⵯⴼⵍⵜ ⵜⴰⵏⴰⵎⵎⴰⵙⵜ. ⵎⴽⵍⵍⵉ ⵉⵜⵜⵔⴰⵔ ⵜⴰⵢⵏⵏⵉⵜ ⵉ ⵓⴷⵔⴰⵙ ⵏ ⵉⵏⵉⴷⴰⵏ ⵏ ⵜⵎⵖⵔⵉⴱⵉⵢⵉⵏ ⴷ ⵉⵎⵖⵔⵉⴱⵉⵢⵏ ⵎⵏⵉⴷ ⵏ ⵉⵙⵏⵏⴳⵔⵓⵜⵏ ⵉⵎⵉⵡⴰⵏⵏ ⴷ ⵉⵡⵏⵏⵉⵜⵏ ⵏ ⵓⵙⵓⵏⴼⵓ ⴷⴰ ⵎⵉ ⵜⴻⵜⵜⵏⵓⵕⵥⵓⵎ ⵜⵏⴱⴰⴹⵜ ⵜⵙⴽⴰⵔⴽⵙ ⵜⵏ ⵜⵉⵍⴰⵡⵜ ⵜⴰⵎⴰⴷⴷⵓⵔⵜ, ⴰⵡⴷ ⵜⵉⴼⵉⴼⵖⵉⵏ ⵏ ⵍⴱⴰⵏⴽ ⵏ ⵍⵎⵖⵔⵉⴱ ⴷ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ ⴷ ⵜⵏⵓⵔⴰⵢⵜ ⵜⴰⵎⴰⵜⵜⴰⵢⵜ ⵉ ⵓⵙⵖⵉⵡⵙ, ⵜⴰⵎⵙⵙⴷⵓⵢⵜ ⵉ ⵓⵏⵖⴰⴷ ⵏ ⵡⴰⴷⴷⴰⴷⵏ ⴷ ⵜⵓⵔⵔⵓⵜ ⵏ ⵥⵥⵍⴹ;
- ⴷⴰ ⵉⵜⵜⵔⴰⵔ ⵜⴰⵢⵏⵉⵜ ⵏ ⵜⵏⴱⴰⴹⵜ ⵎⴰⵙ ⴷ ⵉⵇⵇⴰⵏ ⴰⴷ ⵜⵉⵍⵉ ⴳ ⵓⵙⵡⵉⵔ ⵏ ⵜⵎⴰⵙⴰⵢⵜ ⵏⵏⵙ ⵉⵙⵎⴷⵏ ⴷⴰⵜ ⵏ ⵡⴰⴷⴷⴰⴷ ⴰⵏⴰⵎⵓⵏ ⵉⵅⵛⵏⵏ, ⵜⴰⵏⴼ ⵙ ⵜⵖⴰⵔⴰⵙⵜ ⵉⴼⴰⵡⵏ ⵉ ⵉⵏⴰⵡ ⵏ ⵓⵣⴷⴷⵓⵢ ⵏ ⵡⴰⴷⴷⴰⴷ ⴷ ⵜⵉⵎⵙⴰⵔⵉⵏ ⵜⵉⴳⵔⴰⵖⵍⴰⵏⵉⵏ, ⴷ ⵓⵃⴹⴹⵓ ⵜⵉⴳⵉⵔⴰ ⵏ ⵓⵏⵣⵡⵉ, ⴷ ⵓⵙⵙⵏⵥⵉ ⴰⴽⵔⴽⴰⵙ ⵙ ⵡⵓⴽⴽⵓⵙ ⵏ ⵜⵏⴱⴰⴹⵉⵏ ⵣⵔⵉⵏⵉⵏ ⵍⵍⵉⴳ ⵉⴳⴰ ⵓⴽⴰⴱⴰⵔ ⵏⵏⵓⵏ ⵢⴰⵏ ⵓⴼⵔⴷⵉⵙ ⴰⴷⵙⵍⴰⵏ ⵉⵡⵓⵍⵓ ⵉⴳⵔⴰⵏ ⵉⴽⵙⵡⴰⵜⵏ ⵉⵥⵕⴼⴰⵏⵏ ⴷ ⵉⴷⵎⵙⴰⵏⵏ ⴷ ⵉⵎⵙⵢⴰⴼⵓⵜⵏ;
- ⴷⴰ ⵉⵜⵜⵙⴷⴷⵉⴷ ⵎⴰⵙⴷ ⴰⵙⴳⴳⵯⴰⵙ ⴷ ⵓⵣⴳⵏ ⵉⵣⵔⵉⵏ ⵅⴼ ⵓⵡⵜⴰⵢ ⵏ ⵜⵏⴱⴰⴹⵜ ⵏⵏⵓⵏ, ⴰⵎⵔ ⴰⴷ ⵜⴳⴳ ⵜⵉⵎⴳⴳⵉⵢⵉⵏ ⴷⵓⵙⵏⵉⵏ ⵉ ⵓⴼⵔⴰⴳ ⵏ ⵜⵣⵎⵔⵜ ⵜⴰⵎⵙⵖⵉⵡⵜ ⵏ ⵉⵏⵎⵓⵔⵉⵜⵏ, ⴷ ⵜⵏⵣⴱⴰⵢⵜ ⵏ ⵉⵏⵎⴰⵔⵏ ⵉⵣⵎⵣⴰⵏⵏ, ⴰⴷ ⵉⴳⴰⵏ ⴰⵙⵔⴰⴳ ⴰⴷⵙⵍⴰⵏ ⵏ ⵜⵎⵎⴰⵔⴰ ⵉⵛⵇⵇⴰⵏ ⴳ ⴷⴷⵔⵏ ⵉⵎⵖⵔⵉⴱⵉⵢⵏ ⴰⵙⵙ ⴰⴷ ⴰⴽⴷ ⵍⵖⵍⴰ ⴰⵎⵣⵔⴰⵢ ⵜⵜ ⵉⵏⵏ ⵊⵊⵓ ⵓⵔ ⵉⴽⴽⵉⵏ ⵜⵉⵎⵔⴰⵡⵉⵏ ⴰⵢⴰ;
- ⴷⴰ ⴷ ⵉⵙⵙⴽⵜⵉ ⵉ ⵜⵏⴱⴰⴹⵜ ⵏⵏⵓⵏ ⵎⴰⵙ ⵜⵓⵏⴼ, ⵙ ⵜⴱⵔⵉⴷⵜ ⵜⴰⵎⵙⵎⴰⴷⵜ, ⵉ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ ⵍⵍⵉ ⵜⴳⴳ ⴷ ⴰⵙⴰⵖⵓⵍ ⵏⵏⵙ. ⵎⴽⵍⵍⵉ ⵜⵜ ⵉⴷ ⵜⵙⵙⴽⵜⵉ ⵎⴰⵙ ⵜⵓⵏⴼ ⴰⵔ ⵖⵉⵍⴰⴷ ⵉ ⵉⵙⵖⵡⴰⵏ ⵏⵏⵙ ⵍⵍⵉ ⴷ ⵜⵉⵡⵉ ⴳ ⵜⵙⴳⵓⵔⵉ ⵜⵓⵏⴱⵉⴹⵜ, ⴷⵉⴳⵙⵏ: ⵜⵉⵖⵔⴰⴷ ⵏ ⵓⵣⵔⴰⴽ; ⵜⴰⵎⵔⵏⵉⵡⵜ ⵏ ⵜⵖⵔⴰⴷ ⵏ ⵜⵎⵖⴰⵔⵉⵏ ⴷ ⵉⵔⴳⴰⵣⵏ ⵏ ⵓⵙⵙⵍⵎⴷ; ⴰⵙⵙⵉⵔⵉⵡ ⵏ ⵓⴷⵖⴰⵔ ⵏ ⵜⵙⴽⵯⴼⵍⵜ ⵜⴰⵏⴰⵎⵎⴰⵙⵜ; ⵉⴳⴳⵉⵜ ⵏ 4% ⴰⵎ ⴰⵙⵖⵍ ⵏ ⵜⵙⵔⵉ, ⴷ ⵓⵙⵔⵓⵙ ⵏ 200 ⵏ ⵢⵉⴼⴹ ⵏ ⵓⵙⵓⵍⴼ ⵏ ⵜⵡⵓⵔⵉ ⵜⴰⵔⵎⵙⴽⵉⵍⵜ ⴽⵓ ⴰⵙⴳⴳⵯⴰⵙ; ⴷ ⵓⵙⴰⵜⵜⵓⵢ ⵏ ⵓⵟⵟⵓⵏ ⵏ ⵜⵡⵓⵔⵉ ⴷⴰⵔ ⵜⵎⵖⴰⵔⵉⵏ; ⴷ ⵓⵣⵣⴳⵉⵔ ⵏ ⵓⵙⵓⵖⴷ ⴰⵔⴳⴰⵢ; ⴷ ⵓⵙⵙⵓⴼⵖ ⵏ ⵎⵍⵢⵓⵏ ⵏ ⵜⵡⵊⴰ ⴳ ⵡⴰⴷⴷⴰⴷ ⵏ ⵥⵥⵍⴹ; ⴷ ⵜⵓⴳⵜ ⵏ ⵉⵙⵖⵡⴰⵏ;
- ⴷⴰ ⵉⵙⵙⵓⵜⵓⵔ ⴳ ⵜⵏⴱⴰⴹⵜ ⵏⵏⵓⵏ ⴰⴷ ⵜⵎⵎⴰⵙ ⵙ ⵜⴱⵔⵉⴷⵜ ⵜⴰⵙⴷⵖⵉⵜ ⵉⵎⵓⵔⵙⵏ, ⵙ ⵓⵍⵖⵓ ⵏ ⵜⵡⵏⴰⵖⵜ ⵜⴰⵎⵏⵖⵓⴷⵜ ⵜⴰⵖⵣⵓⵔⴰⵏⵜ, ⵍⵍⵉ ⵓⵔ ⵉⵣⵎⵔⵏ ⴰⴷ ⵉⴱⴷⴷ ⵖⴰⵙ ⵅⴼ ⵜⵙⵔⵜⵉⵜ ⵜⴰⵥⵕⴼⴰⵏⵜ ⴷⴰ ⵉⵎⵍⴰⵏ ⴰⵡⵓⵜⵜⵓ ⵏ ⵓⴷⵔⵉⵣ ⵏⵏⵙ, ⵓⵍⴰ ⵅⴼ ⵜⵙⵓⵍⴰⵏⵜ ⵏ ⵜⵉⵔⵜⵉ ⵉⴳⴳⵓⵜⵏ ⴰⵎⵔ ⴽⵔⴰ ⵏ ⵜⵏⵣⴱⴰⵢⵜ ⵓⵍⴰ ⵜⵉⵎⵉⴳⴳⵉⵢⵉⵏ ⵜⵉⵎⵏⴳⴰⵍⵉⵏ ⵍⵍⵉ ⵔⴰⴷ ⵉⴼⵔⴳ ⵜⴰⵣⵎⵔⵜ ⵜⴰⵎⵙⵖⵉⵡⵜ ⵏ ⵉⵎⵖⵔⵉⴱⵉⵢⵏ. ⴷ ⵉⵇⵇⴰⵏ ⴷ ⴰⴷ ⵜⴳⴳ ⵜⵡⵏⴰⵖⵜ ⴰⴷ ⴰⵙⴱⴷⴷⵉ ⴰⵏⵉⵍⴰⵡ ⵏ ⵓⵖⵓⵍ ⴰⵎⵇⵇⵔⴰⵏ ⵏ ⵡⴰⴷⴷⴰⴷⵏ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ, ⵉⴷⴷⵖ ⵉⵙⴱⴷⴰⴷⵏ ⴷ ⵓⵎⵍⴰⵏ ⵉⵎⴰⴷⴷⵓⴷⵏ ⵀⵔⵛⵏⵉⵏ, ⵙⵍⴰⵡⴰⵏ ⴰⴽⴽⵯ ⵜⴰⵜⵜⵓⵢⵜ ⵏ ⵓⵟⵟⵓⵏ ⴰⵎⵙⵙⵏⵥⵓ ⵏ ⵡⴰⵜⵉⴳⴳⵏ ⵏ ⵜⵙⵓⵎⵔⵜ ⵙ 10,1% ⴳ ⵡⴰⵢⵢⵓⵔ ⵏ ⴱⵕⴰⵢⵕ ⵙⵍⴰⵡⴰⵏ ⴰⴽⴽⵯ ⵙ ⵓⵙⵔⴰⴳ ⵏ ⵜⴰⵜⵜⵓⵢⵜ ⵏ ⵡⴰⵜⵉⴳⴳⵏ ⵏ ⵜⵖⴰⵡⵙⵉⵡⵉⵏ ⵏ ⵡⵓⵜⵛⵉ ⵙ 20,1%; ⴷ ⵉⵙⵏⵉⵎⴰⵍⵏ ⵏ ⵓⵍⴽⴰⵎ ⵏ ⵜⵉⵔⵜⵉ ⴰⵙⵖⵍ ⵏ 5,5% ⴰⵙⴳⴳⵯⴰⵙ ⴰⴷ ⴹⴰⵕⵜ ⵏ ⵓⵍⴽⴰⵎ ⵏⵏⵙ 6,6% ⴰⵙⴳⴳⵯⴰⵙ ⵍⵍⵉ ⵉⵣⵔⵉⵏ; ⴰⵡⴷ ⴰⴼⴼⴰⵍ ⵏ ⵜⴷⵎⵙⴰ ⵜⴰⵏⴰⵎⵓⵔⵜ ⵉ ⵎⴰⴷ ⵉⵜⵜⴳⴳⴰⵏ 24 ⵏ ⵢⵉⴼⴹ ⵏ ⵓⵙⵓⵍⴼ ⵏ ⵜⵡⵓⵔⵉ ⴷ ⵓⵔⴳⴰⵍ ⵏ 12400 ⵏ ⵜⵎⵙⵙⵏⵜⵉⵜ ⴳ ⵓⵙⴳⴳⵯⴰⵙ ⵏ 2022; ⴷ ⵓⵖⵓⵍ ⵏ ⵉⵙⵏⵉⵎⴰⵍⵏ ⵏ ⵓⵙⵖⵍ ⵏ ⵜⵙⵔⵉ ⴰⵙⴳⴳⵯⴰⵙ ⵏ 2023 ⴰⵔ 2,6%, ⴷ ⵓⴽⵛⵛⵓⵎ ⴰⵎⵔⵏⵉⵡ ⵏ ⵉⴷ ⵎⵍⵢⵓⵏ ⵏ ⵉⵎⵖⵔⵉⴱⵉⵢⵏ ⵉ ⵉⵎⵔⵉⵔⵉ ⵏ ⵥⵥⵍⴹ ⴷ ⵜⵍⵎⴹⵉ, ⵓⵔ ⴷ ⵖⴰⵙ ⵙ ⵓⵙⵔⴰⴳ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵎⴰⵛⴰ ⴰⵡⴷ ⵙ ⵓⵙⵔⴰⴳ ⵏ ⵍⵖⵍⴰ ⵏ ⵍⵎⵄⵉⵛⵜ;
- ⴷⴰ ⵉⵜⵜⵙⴷⴷⵉⴷ ⵅⴼ ⵜⵙⵓⵎⴰⵔ ⴰⴽⴽⵯ, ⵜⵉⵙⴷⵖⵉⵜⵉⵏ ⵓⵍⴰ ⵜⵉⵏ ⵓⵣⵎⵣ ⴰⵏⴰⵎⵎⴰⵙ, ⴷⴰ ⵉⴳⴳ ⵓⴽⴰⴱⴰⵕ ⵏ ⵓⴼⴰⵔⴰ ⴷ ⵜⵏⵎⴰⵍⴰ, ⵓⴳⴳⴰⵔ ⵏ ⵓⵙⴳⴳⵯⴰⵙ ⴰⵢⴰ, ⵙⵍⴰⵡⴰⵏ ⴰⴽⴽⵯ:
- ⴰⵙⵎⵔⵙ ⵏ ⵉⵙⴱⴷⴰⴷⵏ ⵏ ⵓⵙⵍⴳⵏ ⵏ ⵜⴷⵔⴼⵉ ⵏ ⵡⴰⵜⵉⴳⴳⵏ ⴷ ⵓⵎⵃⵉⵣⵡⴰⵔ ⴷⴰ ⵢⴰⴽⴽⴰⵏ ⵉ ⵜⵏⴱⴰⴹⵜ ⴰⵙⵡⵓⵜⵜⵓ ⴰⵣⵎⵣⴰⵏ ⵉ ⵡⴰⵜⵉⴳⴳⵏ ⵏ ⵜⵖⴰⵡⵙⵉⵡⵉⵏ ⵍⵍⵉⴳ ⵜⵍⵍⴰ ⵜⴰⵜⵜⵓⵢⵜ ⵉⵀⵔⵛⵏ;
- ⵉⴳⴳⵉⵜ ⵏ ⵜⵉⴹⴰⴼ ⵏ ⵜⵉⴷⵜ ⵉ ⵓⴳⴰⴷⴰⵣ ⴰⵏⴰⵎⵓⵔ, ⴷ ⵓⵙⵎⴽⵍ ⵏ ⵉⵣⴳⴰⵍⵏ ⵏ ⵉⵙⴷⴷⵉⵜⵏ ⵏ ⵓⵙⴳⴷⵣ, ⴷ ⵓⴳⴳⵓⵣ ⵉⴷⵓⵙⵏ ⵅⴼ ⵜⵎⵙⴽⵉⵔⵉⵏ ⵅⵛⵏⵉⵏ ⵏ ⴽⵔⴰ ⵏ ⵉⵏⴰⵎⵎⴰⵙⵏ ⵉⵎⵇⵇⵔⴰⵏⵏ ⴷ ⵉⴱⵍⵖⴰⵣⵏ ⴷ ⵉⵏⴽⵡⴰⵛⵏ, ⵓⵔ ⴷ ⵜⵉⴹⴰⴼ ⵜⴰⵍⵖⴰⵏⵜ ⵉ ⵉⵏⵙⴱⴰⴱⵏ ⵉⵣⵣⵏⵣⴰⵏ ⵙ ⵓⴼⴼⵔⵙⵉ;
- ⵉⴳⴳⵉⵜ ⵏ ⵓⵙⵜⴰⵍ ⴰⵙⴷⵖⵉ ⵉ ⵡⵏⵏⴰⵍ ⵉ ⵉⴷ ⴱⴰⴱ ⵏ ⵡⴰⵙⵙⴰⵢ ⵍⵍⵉ ⵓⵔ ⵉⵡⵛⵏ ⴽⵔⴰ ⵏ ⵓⴷⵔⵉⵣ ⵓⵎⵏⵉⴳ ⴰⵏⵉⵍⴰⵡ;
- ⴰⵏⵏⴰⵍ ⵏ ⵜⵣⵎⵔⵜ ⵜⴰⵎⵙⵖⵉⵡⵜ ⵏ ⵉⵎⵖⵔⵉⴱⵉⵢⵏ, ⵙ ⵜⴱⵔⵉⴷⵜ ⵏ ⵓⵙⵎⵔⵙ ⴰⵏⴰⵎⵓⵏ ⵉ ⵜⵏⵓⴷⴰⴼ ⵜⵉⵎⵔⵏⵉⵡⵉⵏ ⵜⵓⵙⵍⵉⴷⵉⵏ, ⵜⵓⴳⵜ ⵏⵏⵙⵏⵜ ⵓⵙⴰⵏ ⴷ ⴳ ⵜⴰⵜⵜⵓⵢⵜ ⵏ ⵉⵙⵓⴳⴰⵎ ⵉⵔⴳⴰⵢⵏ, ⴷ ⵜⵏⴽⴷⴰ ⵏ ⵜⵏⴰⵍⵉⵜ ⵜⵓⵙⵔⵉⴷⵜ ⵉ ⵜⵡⵊⵉⵡⵉⵏ ⵉⴷⴷⵔⵏ ⴳ ⵥⵥⵍⴹ, ⴷ ⵉⴳⴳⵉⵜ ⵏ ⵜⵖⵔⴰⴷ ⵏ ⵓⵣⵔⴰⴽ ⵉ ⵉⵡⵙⵙⴰⵔⵏ ⴷ ⵜⵎⵔⵏⵉⵡⵜ ⵏ ⵜⵖⵔⴰⴷ ⵏ ⵉⵎⵙⵡⵓⵔⵉⵢⵏ ⵉⵎⵥⵢⴰⵏⵏ ⴷ ⵉⵎⴰⵏⴰⴼⵏ;
- ⴰⵙⵡⵓⵔⵉ ⵏ ⵉⵎⴰⵙⵙⵏ ⵉⴷⵉⵡⴰⵏⵉⵜⵏ, ⴰⵡⴷ ⴰⵔⴳⴰⵢⵏ ⴳ ⵓⵙⵡⵉⵔ ⵏ ⵓⴼⴰⵔⵙ ⴷ ⵜⵙⵎⵓⵔⵜ (ⴰⵔⴳⴰⵢ ⵅⴼ ⵡⴰⵜⵉⴳ ⴰⵎⵔⵏⵉⵡ TVA ⴷ ⵕⵕⵙⵓⵎ ⵏ ⵜⵙⵎⵓⵔⵜ ⵜⴰⴳⵯⵏⵙⴰⵏⵜ TIC, ⴰⴼⴰⴷ ⴰⴷ ⵢⵉⵍⵉ ⵓⴳⵓⵣ ⵏ ⵡⴰⵜⵉⴳⴳⵏ;
- ⴰⵏⴱⴰⴹ ⵏ ⵓⴳⴰⴷⴰⵣ ⵏ ⵓⴽⵎⵉⴹⵏ, ⴷ ⵓⵙⵣⴷⴳ ⵏⵏⵙ ⴳ ⵓⵎⵏⴳⴰⵍ ⵏ ⵜⵏⵓⴼⴰ, ⴷ ⵜⵎⵙⴽⵉⵔⵉⵏ ⴰⴽⴽⵯ ⴷ ⵓⵔ ⵢⵓⵙⵉⵏ ⴷ ⵜⵣⴷⴳⵉ ⴷ ⵜⵎⴰⴼⴰⵡⵜ, ⴷ ⵓⴽⵛⵛⵓⵎ ⴰⴼⴰⴷ ⴰⴷ ⵢⵉⵍⵉ ⵓⴹⴰⴽⴰⵍ ⵏ ⵓⴳⵓⵣ ⵏ ⵡⴰⵜⵉⴳⴳⵏ ⵏ ⵓⴽⵎⵉⴹⵏ ⴰⴷⴷⴰⴷ ⵏ ⵜⵙⵎⵓⵔⵜ ⵙ ⵎⴽⴽⵍⵉ ⴷ ⵢⵓⵙⴰⵏ ⵙ ⵜⵉⴷⵜ ⴷ ⵓⴳⵓⵣ ⵏ ⵡⴰⵜⵉⴳⴳⵏ ⴳ ⵓⴳⴰⴷⴰⵣ ⴰⴳⵔⴰⵖⵍⴰⵏ, ⴷ ⵉⴳⴳⵉⵜ ⵏ ⵡⴰⵔⴳⴰⵢⵏ ⴷ ⵓⵙⴰⵏⵉⵏ ⵅⴼ ⵉⴷ ⵚⴰⵃⴰ ⵅⵛⵏⵉⵏ ⵍⵍⵉ ⵜⴳⴳⵏⵜ ⵜⵎⵙⵙⵓⵔⵉⵏ ⵏ ⵓⴱⴹⴹⵓ ⵏ ⵓⴽⵎⵉⴹⵏ, ⴷ ⵜⵡⴰⴼⵉⵜ ⵏ ⵓⴼⵙⴰⵢ ⴰⵏⵉⵍⴰⵡ ⴰⵏⵚⴽⴰⵡ ⵉ ⵡⴰⵍⵍⴰⵙ ⵏ ⵓⵙⵡⵓⵔⵉ ⵏ ⵍⴰⵙⴰⵎⵉⵔ;
- ⴰⵙⵙⵓⴼⵖ ⵓⴷⵔⵉⴼ ⵏ ⵉⴹⵕⵉⵚⵏ ⵉⵎⵙⵓⴷⵙⵏ ⵉ ⵜⵡⵙⴰ ⵏ ⵓⵙⵇⵇⵉⵎ ⵏ ⵓⵎⵃⵉⵣⵡⵔ ⴰⴼⴰⴷ ⴰⴷ ⵉⴳⴳ ⵜⵉⵍⴰⵍ ⵏⵏⵙ ⴳ ⵢⵉⴳⵔ ⵏ ⵜⵉⴹⴰⴼ ⵏ ⵡⴰⵜⵉⴳⴳⵏ ⴷ ⵓⵙⴱⴷⴷⵉ ⵏ ⵜⴱⵍⵖⴰⵣⵜ ⴷ ⵓⴽⵡⴰⵛ ⴰⵔⵓⵣⵔⵉⴼ ⴷ ⵓⵃⵟⵟⵓ ⴰⵏⴼⴼⴰⵔ ⵏ ⵙⵙⵍⵉⵄⵜ;
- ⵜⵉⴽⴽⵉ ⵏ ⵓⵙⵉⵣⵡⵔ ⵉ ⵜⵏⴼⵔⵓⵜ ⵏ ⵡⵓⵜⵛⵉ ⵜⴰⵏⴰⵎⵓⵔⵜ, ⵉⵎⵓⵏⵏ ⴷ ⵓⵙⵜⴰⵍ ⵓⴷⵔⵉⴼ, ⴰⵙⵏⵜⴰⵍ ⴰⴼⴳⵔⴰⵛ, ⵉ ⵜⵢⴰⴼⵓⵜⵉⵏ ⵏ ⵜⵡⵏⴰⵖⵜ ⵏ ⵍⵎⵖⵔⵉⴱ ⴰⵣⴳⵣⴰⵡ, ⴷ ⵡⴰⵍⵍⴰⵙ ⵉⴷⵔⴰⵏ ⵉ ⵜⵡⵏⴰⵖⵜ ⵏ ⵜⴰⵙⵓⵜ ⵜⴰⵣⴳⵣⴰⵡⵜ ⴷ ⵜⵙⵔⵜⵉⵜⵉⵏ ⵜⵉⴽⵔⵣⴰⵏⵉⵏ ⵉⴱⴷⴷⵏ ⵓⴳⴳⴰⵔ ⵅⴼ ⵓⴼⴰⵔⵙ ⵉⵜⵜⵡⴰⴳⴳⵏ ⵉ ⴱⵕⵕⴰ ⵏ ⵜⵎⴰⵣⵉⵔⵜ;
- ⵉⴳⴳⵉⵜ ⵏ ⵉⵙⵡⵓⴷⴷⵓⵜⵏ ⴷ ⵉⵇⵇⴰⵏ, ⵎⴽⵍⵍⵉ ⴷ ⵓⵙⴰⵏ ⴽⵔⴰ ⴳⵉⵜⵙⵏ ⴳ ⵡⴰⵔⵔⴰ ⵏ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ, ⴰⴼⴰⴷ ⴰⴷ ⵜⵉⵍⵉ ⵜⵖⵜⴰⵙⵜ ⵏ ⵜⴼⴰⴷⴷⵉⵡⵉⵏ ⵏ ⵓⵏⴱⴰⴹ ⵉⵖⵓⴷⴰⵏ ⴷ ⵓⵙⵎⴰⴷ ⵙ ⵜⵎⵏⴰⴳⴰⵔⵜ ⴷ ⵓⵎⵢⴰⵡⴰⵙ ⵏⴳⵔ ⵜⵎⵔⵙⴰⵍ ⴰⴽⴽⵯ ⵜⵉⵏⴰⵎⵓⵔⵉⵏ, ⵃⵎⴰ ⴰⴷ ⵢⵉⵍⵉ ⵉⴳⴳⵉⵜ ⴰⵏⵉⵍⴰⵡ ⵏ ⵓⵡⴰⵏⴽ ⵏ ⵓⵙⵍⴳⵏ ⴳ ⵢⵉⴳⵔ ⴰⴷⵎⵙⴰⵏ, ⴷ ⵓⵙⴱⴷⴷⵉ ⵏ ⵔⵔⵉⵢⵄ ⴷ ⵓⴳⵓⴼⵙⵓ ⴷ ⵓⴽⵡⴰⵛ ⴰⵔⵓⵣⵔⵉⴼ, ⴰⴼⴰⴷ ⴰⴷ ⵉⵍⵉⵏ ⵉⵏⵣⵡⵉⵜⵏ ⴷ ⵉⵎⵙⴰⵙⴰⵏ ⴷ ⵓⵍⴷⴰⵢ ⵏ ⵓⵙⵙⴰⵔⵓ ⴷ ⵓⵙⵔⵓⵙ ⵏ ⵉⵙⵓⵍⴼⵏ ⵏ ⵜⵡⵓⵔⵉ.
ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ;
ⴰⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ ⵔⴰⴷ ⵉⴹⴼⵕ ⵜⴰⵖⵏⵙⴰ ⵏⵏⵙ ⴷ ⵜⵡⵓⵔⵉ ⵏⵏⵙ, ⴳ ⵡⴰⵏⵙⴰ ⵏ ⵜⵓⵣⵍⵜ ⵜⴰⵏⴰⵎⵓⵔⵜ, ⵜⴰⵏⵚⴽⴰⵡⵜ ⵜⴰⵎⵙⵜⴳⴳⴰⵔⵜ, ⵙ ⵉⵎⴰⵙⵙⵏ ⴰⴽⴽⵯ ⴳⴰⵏⵉⵏ ⵓⵣⵔⵉⴼⵏ, ⴰⴼⴰⴷ ⴰⴷ ⵉⵏⵜⵓ ⵜⴰⵏⴱⴰⴹⵜ ⵏⵏⵓⵏ ⴰⴷ ⵜⵎⴰⵙⵙ ⵙ ⵜⴱⵔⵉⴷⵜ ⵉⵎⵓⵔⵙⵏ ⵉⴷⵓⵙⵏ, ⵉ ⵓⴼⵔⴰⴳ ⵏ ⵜⵣⵎⵔⵜ ⵜⴰⵎⵙⵖⵉⵡⵜ ⵏ ⵉⵎⵖⵔⵉⴱⵉⵢⵏ, ⴷ ⵜⵖⵜⴰⵙⵜ ⵏ ⵜⵣⵔⴼⵜ ⵜⴰⵏⴰⵎⵓⵏⵜ ⴷ ⵜⴷⵖⵔⴰⵏⵜ, ⴷ ⵓⵙⴷⵓⵙ ⵏ ⵜⴷⵎⵙⴰ ⵜⴰⵏⴰⵎⵓⵔⵜ, ⴷ ⵜⵓⵚⴽⴰ ⵜⴰⴷⵉⵎⵓⵕⴰⵟⵉⵜ ⴷ ⵓⵙⵉⵔⵉⵡ ⵏ ⵓⵙⴰⵢⵔⵓⵔ ⵏ ⵉⵣⵔⴼⴰⵏ ⴷ ⵜⴷⵔⴼⵉⵢⵉⵏ ⴷ ⵜⴳⴷⵓⵜ, ⴷ ⵓⴹⴰⴽⴰⵍ ⵏ ⵜⵓⴷⵔⵜ ⵏ ⵓⵣⵔⴰⴽ ⵉ ⵜⵙⴽⵯⴼⴰⵍ ⴰⴽⴽⵯ ⵏ ⵓⴳⴷⵓⴷ ⵏⵏⵖ, ⵏⴻⵏⵏⵓⵔⵣ ⴰⴷ ⵜⵎⵔⴰⵔⴰ ⵜⵏⴱⴰⴹⵜ ⵏⵏⵓⵏ ⵙ ⵜⵖⴰⵔⴰⵙⵜ ⵜⵎⴰⵍⴰⵡⵜ ⴰⴽⴷ ⵉⵡⵏⵏⵉⵜⵏ ⴰⴽⴽⵯ ⵉⴳⴷⵓⴷⴰⵏⵏ ⵓⵣⵔⵉⴼⵏ ⴷ ⵉⵎⵙⵜⴳⴳⴰⵔⵏ ⴳ ⵓⵎⵏⵉⴷ ⴰⴷ.
ⴷ ⴰⵔ ⵉⵥⵕⵕⴰ ⵓⴽⴰⴱⴰⵔ ⵏⵏⵖ ⵎⴰⵙⴷ ⵉⵙⴰⴽⴰⵜⵏ ⴰⴷ ⵉⵎⵙⴰⴷⴰⵖⵏ ⴷ ⵉⵎⵙⵎⴰⴷⵏ ⵡⴰⵃⴷⵓⵜⵏ ⵓⵔ ⵣⵎⵔⵏ ⴰⴷ ⵙⴷⵓⵙⵏ ⵉⵏⵉⵔ ⴳⵯⵏⵙⴰⵏ ⴷ ⵓⵍⴽⴰⵎ ⵏ ⵎⴰⵕⵕⴰ ⵉⵎⵙⴰⵔⴰⵙⵏ ⵏ ⵓⴳⵏⵙⵓ ⴷ ⴱⵕⵕⴰ ⵏ ⵜⵎⴰⵣⵉⵔⵜ ⵏⵏⵖ.
ⴰⴽⴷ ⴰⵙⵎⵖⵔ ⴰⴽⵙⵡⴰⵜ ⴷ ⵓⵣⵓⵍ ⴰⵎⵇⵇⵔⴰⵏ.
ⴰⵎⴰⵔⵉⵙ ⴰⵙⵔⵜⴰⵏ ⵏ ⵓⴽⴰⴱⴰⵔ ⵏ ⵓⴼⴰⵔⴰ ⴷ ⵜⵏⵎⵍⴰ
ⴰⵏⴼⵍⵓⵙ ⴰⵎⴰⵜⴰⵢ: ⵎⵓⵃⵎⵎⴰⴷ ⵏⴰⴱⵉⵍ ⴱⵏⵄⴱⴷⵍⵍⴰⵀ