ⵜⴰⵙⴳⵓⵔⵉ ⵏ ⵓⵙⵉⵔⴰ ⴰⵙⵔⵜⴰⵏ ⵏ ⵓⴽⴰⴱⴰⵕ ⵏ ⵡⴰⵍⴰⵢ ⴷ ⵜⵙⵔⵎⵓⵏⵜ ⵙ ⵜⵎⵍⴷⴰ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵜⵎⵖⴰⵔⵜ 08 ⵎⴰⵕⵚ 2026
ⴰⵔ ⵉⵙⴼⵓⴳⵍⵓ ⵓⴽⴰⴱⴰⵕ ⵏ ⵡⴰⵍⴰⵢ ⴷ ⵜⵙⵔⵎⵓⵏⵜ, ⴰⵎ ⵎⴰⵕⵕⴰ ⵜⵉⵎⴰⴷⴷⴰⵙⵉⵏ ⵜⵉⴷⵉⵎⵓⵇⵔⴰⵟⵉⵢⵉⵏ ⴳ ⵓⵎⴰⴹⴰⵍ, ⴰⵙⵙ ⴰⵎⴰⴹⵍⴰⵏ ⵏ ⵜⵎⵖⴰⵔⵜ, ⵉⵎⵙⴰⵙⴰⵏ ⴷ 8 ⵎⴰⵕⵥ, ⵉⴳⴰⵏ ⴰⵙⵔⵙ ⵉⴽⵜⴰⵔⵏ ⵙ ⵡⴰⵎⵎⴰⴽⵏ ⴷⵓⵙⵏⵉⵏ ⴷⵔⴰⵏⵉⵏ, ⵉⵟⵟⴰⴼⵏ ⴰⵥⴰⵥⵓ ⴰⵎⵖⵏⴰⵙ ⵙ ⵜⵖⵏⵙⴰ ⵜⴰⵙⵓⵍⴰⵏⵜ ⵏ ⵉⵎⵓⵙⵙⵓⵜⵏ ⵏ ⵓⵙⵍⴻⵍⵍⵉ ⵉ ⵢⵉⵙⴽⵉⵍ ⴷ ⵜⵍⴻⵍⵍⵉ.
ⵙ ⵜⵎⵍⴷⴰ ⴰⴷ ⵜⴰⵎⵜⵜⵉⵡⵜ, ⴰⵔ ⵉⵜⵜⴰⵣⵏ ⵓⴽⴰⴱⴰⵕ ⵏ ⵡⴰⵍⴰⵢ ⴷ ⵜⵙⵔⵎⵓⵏⵜ ⴰⵣⵓⵍ ⴰⵎⴰⵜⵜⵓⵢ ⴰⵎⵖⵏⴰⵙ ⵉ ⵎⴰⵕⵕⴰ ⵜⵉⵎⵖⴰⵔⵉⵏ ⵏ ⵓⵎⴰⴹⴰⵍ, ⵙⵍⴰⵡⴰⵏ ⴰⴽⴽⵯ ⵜⵉⴷ ⵍⵍⴰⵏⵉⵏ ⴳ ⵡⴰⴷⴷⴰⴷ ⵏ ⵉⵎⴰⵖⵏ ⴷ ⵓⵥⵍⴰⴹ ⴷ ⵓⵙⵖⵍⵍⵓ ⴷ ⵓⵙⵏⵓⵃⵢⵓ, ⴷ ⵎⴰⵕⵕⴰ ⵜⵉⵎⵖⵏⴰⵙⵉⵏ ⵉ ⵓⵎⴹⴰⵍ ⵖ ⵍⵍⴰⵏ ⵡⴰⵜⵉⴳⵏ ⵏ ⵢⵉⵙⴽⵉⵍ ⴷ ⵡⴰⴷⴷⵓⵔ ⴰⵏⴼⴳⴰⵏ, ⵉⵥⵍⵉ ⵓⴽⴰⴱⴰⵕ ⴰⵣⵓⵍ ⵏⵏⵙ ⵉ ⵜⵎⵖⴰⵔⵜ ⵜⴰⴼⵉⵍⵉⵙⵟⵉⵏⵉⵜ, ⵉⵥⵥⵉⴹⵕⵏ, ⵜⴰⵎⴰⵜⴰⵔⵜ ⵏ ⵜⵏⵣⴱⴰⵢⵜ ⴷⴰⵜ ⵏ ⵜⵜⴰⵄⴰⴷⴷⵓ ⴰⵚⵀⵢⵓⵏⵉ ⵉⵀⵔⵛⵏ ⴷ ⵜⴳⵓⴹⵉⵡⵉⵏ ⵏ ⵜⵎⴰⵖⵜ ⵏ ⵓⵊⵉⵏⵓⵚⵉⴷ ⴰⵎⴳⵔⵓ.
ⵖⵎⴽ ⵍⵍⵉ ⵉⵣⵣⵓⵍ ⵓⴽⴰⴱⴰⵕ ⵏ ⵡⴰⵍⴰⵢ ⴷ ⵜⵙⵔⵎⵓⵏⵜ ⴱⴰⵀⵔⴰ ⵜⴰⵎⵖⵔⵉⴱⵉⵜ ⵙ ⵎⴰⵕⵕⴰ ⵜⴰⵙⵓⵜⵉⵏ ⵏⵏⵙ, ⴳ ⵎⴰⵕⵕⴰ ⵉⴳⵔⴰⵏ ⴷ ⵉⵙⴰⵢⵔⵓⵔⵏ, ⵉⴽⵜⵉ ⴷ ⵙ ⵓⴱⵓⵔⵣ ⴰⴱⵔⵉⴷ ⴰⵎⵖⵏⴰⵙ ⵉⵛⵛⴰⵔⵏ, ⵍⵍⵉ ⵉⵙⴽⵔ ⴰⴽⴷ ⵉⵎⵖⵏⴰⵙⵏ ⵉⵏⴰⵎⵓⵔⵏ ⴷ ⵉⴷⵉⵎⵓⵇⵔⴰⵟⵉⵢⵏ, ⵏ ⵜⵎⵖⴰⵔⵉⵏ ⴷ ⵉⵣⵔⴼⴰⵏⵏ, ⵉ ⵓⵙⵙⵕⵚⵓ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ ⴷ ⵓⵙⵎⵖⵔ ⵏⵏⵙⵏ, ⴳⴰⵏⵉⵏ ⵙⴳ ⵜⵎⴰⵖⵜ ⵏ ⵜⴷⵉⵎⵓⵇⵔⴰⵟⵉⵜ ⴷ ⵓⵙⵎⴰⵢⵏⵓ ⴷ ⵡⴰⵍⴰⵢ ⴷ ⵜⵣⵔⴼⵜ ⵜⴰⵏⴰⵎⵓⵏⵜ ⴷ ⵢⵉⵙⴽⵉⵍ ⴰⴷⵖⴰⵔⴰⵏ ⴷ ⵜⵣⵔⴼⵜ ⵏ ⵓⵏⵣⵡⵉ.
ⵉⵙⵓⵜⴳ ⵓⴽⴰⴱⴰⵕ ⵏ ⵡⴰⵍⴰⵢ ⴷ ⵜⵙⵔⵎⵓⵏⵜ ⵓⵎⵎⵉⵥⵏ ⵏ ⵢⵉⵙⴽⵉⵍ ⵍⵍⵉ ⵜⵙⴳⵓⴷⵉ ⵜⵎⴰⵣⵉⵔⵜ ⵏⵏⵖ, ⵍⵍⵉ ⵉⵙⵙⵕⵚⴰ ⵓⴷⵓⵙⵜⵓⵔ ⵏ 2011, ⴳ ⵓⵎⴰⴳⵔⴰⴷ ⵏⵏⵙ ⵡⵉⵙ 19, ⵍⵍⵉ ⵉⵙⵙⵕⵚⴰⵏ ⴰⵎⵏⵣⴰⵢ ⵏ ⵢⵉⵙⴽⵉⵍ, ⴰⵔ ⵉⵜⵜⵣⵎⵎⵉⵎ ⵙ ⵓⵖⵉⵍⵓⴼ, ⵜⴰⵣⵣⵉⴳⵣⵜ ⵏⴳⵔ ⴰⴹⵕⵉⵚ ⴰⴷⵙⵜⴰⵔ ⴷ ⵉⵙⵖⵡⴰⵏⵏ ⵉⴳⵔⴰⵖⵍⴰⵏⵏ ⵏ ⵍⵎⵖⵔⵉⴱ, ⵖ ⵜⵍⵍⴰ ⵜⵎⵢⴰⵇⵇⴰⵏⵜ ⵏ ⵙⵉⴷⴰⵡ, ⴷ ⵜⵉⵍⴰⵡⵜ ⵏ ⵜⵎⵙⴽⵔⵜ ⵜⴰⵡⵓⵙⵙⴰⵏⵜ, ⵜⵇⵇⴰⵏ ⵜⵉⵔⴰⵜ ⵜⴰⵙⵔⵜⴰⵏⵜ ⵉⵎⵇⵇⵓⵔⵏ, ⵍⵍⵉ ⵓⵙⵉⵏ ⵎⴰⵕⵕⴰ ⵉⵎⵙⴽⴰⵔⵏ, ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵜⵎⵢⴰⴷⴰⵙⵉⵏ ⵏ ⵓⵇⵇⵍ ⵙⵔⵙⵏⵉⵏ ⵢⵉⵙⴽⵉⵍ ⵉⵙⵎⴷⵏ ⵖⴰⵙ ⴳ ⵜⵉⴳⵔ ⵏ ⵜⵥⵓⴳⴰⵢ.
ⴳ ⵓⵎⵏⴰⴹ ⴰⴷ, ⴰⵔ ⵉⵥⵕⵕⴰ ⵓⴽⴰⴱⴰⵕ ⵏ ⵡⴰⵍⴰⵢ ⴷ ⵢⵉⵙⴽⵉⵍ ⵎⴰⵙ ⴷ ⴰⵎⵓⵟⵍ ⵏ ⵜⵏⴱⴰⴹⵜ ⴳ ⵓⵙⵎⵏⵉⴷ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵜⵓⵡⵊⴰ ⴷⴰⵔⵙ ⴰⵥⴰⵥⵓ ⴰⵏⴰⵎⵓⵏ ⴷ ⵓⵣⵔⴼⴰⵏ ⵎⵇⵇⵓⵔⵏ, ⵙ ⵎⴰⴷ ⵉⵟⵟⴰⴼ ⵓⵙⴰⵡⵓⵔ ⴰⴷ ⴰⵣⵣⵔⴰⴼ ⴳ ⵡⴰⵜⵉⴳ ⴳ ⵓⵏⴳⵔⴰⵡ ⴰⵣⴻⴼⴰⵏ ⴷ ⵓⵏⴰⵎⵓⵏ ⴰⵎⵖⵔⵉⴱⵉ, ⵍⵍⵉⵖ ⵉⴳⴰ ⵜⴰⵔⵙⵍⵜ ⵜⴰⵎⵇⵔⴰⵏⵜ ⴳ ⵜⵙⵔⵜⴰⵢ ⵏ ⵓⵙⵎⵖⵔ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ, ⴳ ⵓⵎⵏⴰⴹ ⴰⴷ ⴰⵔ ⵉⵙⵎⴰⵢⵏⵓ ⵜⵓⵜⵔⴰ ⵏⵏⵙ ⵉ ⵜⵏⴱⴰⴹⵜ ⵃⵎⴰ ⴰⴷ ⵢⵉⵍⵉ ⵓⵣⵓⵛⵛⵍ ⵏ ⵓⵎⵓⴽⵏ, ⵙ ⵓⵎⵙⴰⵙⴰ ⵏ ⵜⵎⵥⵍⴰ ⵏ ⵓⵙⵎⴰⵢⵏⵓ ⵉⵎⵙⴰⵙⴰⵏ ⴷ ⵉⵙⵏⴼⵍⵏ ⴷⵔⴰⵏⵉⵏ ⵏ ⵡⴰⵎⵓⵏ ⵏ ⵍⵎⵖⵔⵉⴱ, ⴷ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⴷ ⵉⵙⵖⵡⴰⵏ ⵉⴳⵔⴰⵖⵍⴰⵏⵏ ⵏ ⵍⵎⵖⵔⵉⴱ.
ⵖⵎⴽ ⵍⵍⵉ ⵉⵜⵜⵣⵎⵎⵉⵎ ⵓⴽⴰⴱⴰⵕ, ⵙ ⵛⵉⴳⴰⵏ ⵏ ⵓⵖⵉⵍⵓⴼ, ⵓⵖⵓⵍ ⵏ ⵓⵙⵖⵍ ⵏ ⵜⵉⵍⴰⵍⵜ ⵜⴰⴷⵎⵙⴰⵏⵜ ⵏ ⵜⵎⵖⴰⵔⵉⵏ ⵜⵉⵎⵖⵔⵉⴱⵉⵢⵉⵏ, ⵙ ⵓⵎⵢⴰⵙⴰ ⵏ ⵓⵙⵡⵓⵔⵉ ⵏ ⵜⵓⴳⵜ ⴳⵉⵙⵏⵜ ⴳ ⵢⵉⴳⵔ ⴰⵔⵓⵍⴳⵉⵏ ⴷ ⵜⵡⵓⵔⵉ ⵜⴰⵔ ⵜⵉⵖⵔⴰⴷ, ⴰⵢⵍⵍⵉ ⵉⵙⴷⴷⵉⴷⵏ ⴰⵔⴰⵎⵓⵔⵙ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵍⵍⴰⵏⵉⵏ ⴳ ⵓⵙⴽⵔ ⵏ ⵓⵙⵉⵥⴹⵕ ⴰⴷⵎⵙⴰⵏ, ⵉⵖ ⵏⵙⵙⵏ ⵎⴰⵙ ⴷ ⴰⵣⵣⵉⴳⵣ ⴳ ⵜⵕⵥⵉ ⵏ ⵜⵙⵓⴳⴰⵔ ⵏ ⵜⵎⵖⴰⵔⵉⵏ ⴷ ⵢⵎⵣⵔⴰⵢ ⵖ ⵜⵖⵔⴰⴷ ⵉⵍⴽⵎⵏ 20 %, ⴳⴰⵏ ⵜⵉⵕⵥⵉ ⵏ ⵓⴳⵯⵏⵙ ⵏ ⵓⵙⵏⴼⴰⵔ ⵏ ⵓⵡⴰⵏⴽ ⴰⵏⴰⵎⵓⵏ ⵍⵍⵉ ⵙ ⵓⴽⴰⵏ ⵜⴻⵜⵜⵉⵔⵉⵔ ⵜⵏⴱⴰⴹⵜ ⴰⴷ ⵉⵍⵍⴰⵏ ⴱⵍⴰⴰ ⴷⴰⵔⵙ ⵉⵎⵉⵥ ⵏ ⵜⵉⴷⵜ ⴷ ⵓⵔ ⵉⵟⵟⴰⴼⵏ ⴰⴷⵔⵉⵣ ⵉⴼⴰⵡⵏ ⴼ ⵜⵉⵍⴰⵡⵜ ⵏ ⵜⵎⵖⵔⵉⴱⵉⵢⵉⵏ ⴷ ⵉⵎⵖⵔⵉⴱⵉⵢⵏ.
ⴳ ⵓⵎⵏⴰⴹ ⴰⴷ, ⵎⵇⵇⴰⵔ ⵉⵍⵍⴰ ⵓⵙⵖⵓⴷⵓ ⵉⴷⵔⵓⵙⵏ ⴳ ⵉⵙⵖⵍⵏ ⵏ ⵓⵙⵎⵍ ⴳ ⵜⵣⵣⵓⵍⵉⵏ ⴰⵜⵜⵓⵢⵏⵉⵏ, ⵍⴽⵎⵏⵉⵏ 15.5 %, ⴰⵔ ⵉⵙⴷⴷⵉⴷ ⵓⴽⴰⴱⴰⵕ ⵎⴰⵙ ⴷ ⴰⵙⵖⵍ ⴰⴷ ⴰⵎⵓⵟⵟⵓⵏ ⴰⵔ ⵉⵎⵎⴰⵍ ⴰⵎⵣⵔⴰⵢ ⵉⴳⴳⵓⵜⵏ ⴷ ⵉⴷⵔⴰⵏ ⵊⴰⵔ ⵓⵏⴰⵔⵓⵣ ⵏ ⵢⵉⵙⴽⵉⵍ ⴰⴷⵙⵜⴰⵔ ⴷ ⵜⵣⵣⵉⴳⵣⵜ ⵏ “ⵓⵣⵓⵔ ⵏ ⵊⵊⴰⵊ” ⴷⴰⵜ ⵏ ⵜⵙⵓⴳⴰⵔ ⵏ ⵜⵎⵖⴰⵔⵉⵏ.
ⵙ ⵓⵣⴷⴰⵢ ⴷ ⵜⵉⵍⴰⵡⵜ ⴰⴷ, ⵍⵍⵉⵖ ⴷ ⴰⵥⵏ ⵉⵙⵜⴰⵢⵏ ⵏ 2026, ⴰⵔ ⵉⵙⵎⴰⵢⵏⵓ ⵓⴽⴰⴱⴰⵕ ⵜⵓⵜⵔⴰ ⵏⵏⵙ ⵉ ⵓⵙⵖⵣⵏ ⵏ ⵉⵙⵡⵓⴷⴷⵓⵜⵏ ⵥⵍⵉⵏⵉⵏ ⵖ ⵉⵍⵍⴰ ⵓⵙⵙⵔⵇⴱ, ⵉ ⵡⴰⵍⴰⵢ ⴷ ⵢⵓⵙⴰⵏ ⵏ ⵜⴳⵯⵏⵙⴰⵙⵜ ⵏ ⵜⵎⵖⴰⵔⵉⵏ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⵃⵎⴰ ⴰⴷ ⵢⵉⵍⵉ ⵓⵙⴽⵔ ⵏ ⵓⵎⵏⵣⴰⵢ ⵏ ⵢⵉⵙⴽⵉⵍ ⴷ ⵜⵉⵍⵜ ⵏ ⵜⴷⵔⴰⵡⵜ ⵏ ⵜⵎⵖⴰⵔⵜ ⴳ ⵡⴰⵎⵎⴰⵙⵏ ⵏ ⵜⵖⵜⴰⵙⵜ ⴷ ⴰⵍⴰⵢ ⴰⵙⵉⵍⴰⵏ ⵉ ⵓⵙⴷⵓⵙ ⵏ ⵓⴱⵔⵉⴷ ⴰⴷⵉⵎⵓⵇⵔⴰⵟⵉ ⵓⵏⴳⵉⵎ ⴰⵏⴰⵎⵓⵔ.
ⵙ ⵜⵎⵍⴷⴰ ⵏ ⵓⵙⴼⵓⴳⵍⵓ ⵏ ⵡⴰⵙⵙ ⴰⵎⴰⴹⵍⴰⵏ ⴰⵏⴱⵔⴰⵣ ⵏ ⵜⵎⵖⴰⵔⵜ, ⴰⵔ ⵉⵙⴼⵓⴳⵍⵓ ⵓⴽⴰⴱⴰⵕ ⵏ ⵡⴰⵍⴰⵢ ⴷ ⵜⵙⵔⵎⵓⵏⵜ, ⵜⴰⵖⵏⵙⵉⵡⵉⵏ ⵏ ⵉⵎⵓⵙⵜⵏ ⵏ ⵜⵎⵖⴰⵔⵉⵏ ⴷ ⵉⵣⵔⴼⴰⵏ ⴳ ⵜⵎⴰⵣⵉⵔⵜ ⵏⵏⵖ, ⴰⵔ ⵉⵙⴷⴷⵉⴷ ⵎⴰⵙ ⴷ ⵜⴰⵎⵙⴰⵔⵜ ⵏ ⵜⵎⵖⴰⵔⵜ ⵜⴳⴰ ⵜⴰⵎⵇⵔⴰⵏⵜ ⴷ ⵜⴰⴷ ⵉⴷⵔⴰⵏ ⵙ ⴽⵉⴳⴰⵏ ⴼ ⵜⵓⵜⵔⴰ ⵉⵥⵍⵉⵏ, ⴰⵛⴽⵓ ⵜⴳⴰ ⵜⴰⵔⵙⵍⵜ ⵜⴰⵙⵉⵍⴰⵏⵜ ⵏ ⵜⴷⵉⵎⵓⵇⵔⴰⵟⵜ ⴷ ⵢⵉⵙⴽⵉⵍ ⴷ ⵜⵣⵔⴼⵜ ⵜⴰⵏⴰⵎⵓⵏⵜ, ⵜⴳ ⵜⴰⵙⵖⵍⵜ ⵏ ⵜⵉⴷⵜ ⵉⵎⵎⴰⵍⴰⵏ ⴰⵙⵡⵉⵔ ⵏ ⵜⴳⵎⵉ ⵜⴰⵙⵓⵍⴰⵏⵜ.
ⴰⵔ ⵉⵙⴼⵓⴳⵍⵓ ⵓⴽⴰⴱⴰⵕ ⵜⵉⵖⵏⵙⵉⵡⵉⵏ ⵏ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ, ⴰⵔ ⵢⴰⵇⵔⴰ ⵙ ⵓⵖⵣⴰⵏ, ⵉ ⵜⵉⵍⵉⵜ ⵏ ⵜⵓⴳⴳⴰⵙ, ⵃⵎⴰ ⴰⴷ ⵢⵉⵍⵉ ⵓⵙⵏⴼⵍ ⵏ ⵉⵎⵏⵣⴰⵢ ⵉⴷⵙⵜⴰⵔⵏ ⴷ ⵉⵉⵙⵖⵡⴰⵏⵏ ⵉⵣⵔⴼⴰⵏⵏ ⵉⴳⵔⴰⵖⵍⴰⵏⵏ ⵏ ⵜⵎⴰⵣⵉⵔⵜ ⵏⵏⵖ ⵙ ⵜⵉⵍⴰⵡⵜ ⵉⴼⴰⵡⵏ ⴳ ⵉⵍⵍⴰ ⵓⴼⵔⴰⴳ ⴷ ⵡⴰⴷⴷⵓⵔ ⴷ ⵓⵙⵉⵥⴹⵕ ⴰⵎⴰⵜⴰⵢ ⵉ ⵎⴰⵕⵕⴰ ⵜⵉⵎⵖⴰⵔⵉⵏ.
ⵖⵎⴽ ⵍⵍⵉ ⵢⴰⵇⵔⴰ ⵓⴽⴰⴱⴰⵕ ⵉ ⵓⵛⵛⵉⵍ ⵏ ⵓⵙⵎⴰⴷ ⵏ ⵉⵙⴰⵡⵓⵔⵏ ⵉⵣⵣⵔⴰⴼⵏ ⴷ ⵉⵙⵔⵜⴰⵏⵏ ⴷ ⵉⵎⵔⵙⵍⴰⵏⵏ ⵍⵍⵉ ⵔⴰⴷ ⵉⴹⵎⵏ ⴰⵙⵉⵜⵜⵉ ⵏ ⵎⴰⵕⵕⴰ ⵓⴷⵎⴰⵡⵏ ⵏ ⵓⵙⵏⵓⵃⵢⵓ ⵎⵏⵉⴷ ⵏ ⵜⵎⵖⴰⵔⵜ, ⵜⴳ ⵜⴼⵓⴳⵍⴰ ⴰⴷ ⴰⴱⴷⴷⴰⴷ ⵉ ⵓⵣⵣⵔⴰⵢ ⴷ ⵓⵙⵇⵙⴰⵢ ⴷ ⵓⵙⵖⵡⵏ, ⵍⵍⵉⵖ ⵏⴼⵔⴽ ⵎⴰⵙ ⴷ ⵍⵎⵖⵔⵉⴱ ⵏ ⵉⵎⴰⵍ, ⵍⵎⵖⵔⵉⴱ ⵏ ⵡⴰⴷⴷⵓⵔ ⴷ ⵜⵣⵔⴼⵜ ⴷ ⵓⵙⵎⴰⵢⵏⵓ ⴷ ⵜⴷⵉⵎⵓⵇⵔⴰⵟⵉⵜ, ⵓⵔ ⵔⴰⴷ ⵢⵉⵍⵉ ⵓⵚⴽⵓ ⵏⵏⵙ ⴰⴱⵍⴰ ⵙ ⵢⵉⵙⴽⵉⵍ ⴷ ⵜⵏⴳⴰⴷⴷⴰⵢⵜ, ⵎⴽ ⵍⵍⵉ ⵔⴰⵏⵜ ⵎⴰⵕⵕⴰ ⵜⵓⴷⴷⵉⵙⵉⵏ ⵜⵉⴷⵉⵎⵓⵇⵔⴰⵟⵉⵢⵉⵏ ⴳ ⵜⵎⴰⵣⵉⵔⵜ ⵏⵏⵖ.
ⴳⴰⵏ ⵉⵡⵜⵜⴰⵙ ⵥⵉⵍⵏⵉⵏ ⴳⴰⵏⵉⵏ ⵉⵎⴰⵜⵜⵓⵢⵏ ⵔⴰⵏⵉⵏ ⴰⵍⵜⴰⵖ ⵉⴼⵔⴽⵏ ⴷ ⵓⵎⴰⵙⴰⵢ ⵏ ⵎⴰⵕⵕⴰ ⵜⵉⵥⴹⴰⵕⵉⵏ ⵜⵉⵏⴰⵎⵓⵔⵉⵏ ⴼⵔⴽⵏⵉⵏ ⵙ ⵢⵉⵙⴽⵉⵍ, ⵜⵉⵎⵖⴰⵔⵉⵏ ⴷ ⵉⵔⴳⴰⵣⵏ, ⴳ ⵓⴱⵔⵉⴷ ⵏ ⵓⵙⵙⵏⴼⵍ ⴷ ⵓⵚⴽⵓ, ⴷ ⵜⵡⴰⴷⴰ ⵙ ⵜⵎⴷⵔⴰⵡⵜ ⵜⴰⵙⵔⵜⴰⵏⵜ ⵉⴳⴳⵓⵜⵏ ⴳ ⵉⵍⵍⴰ ⵓⵎⵢⴰⵙⴰ ⴷ ⵓⴼⵔⴰⴽ ⴷ ⵓⵙⵖⵡⵏ, ⵃⵎⴰ ⴰⴷ ⵉⴳ ⵓⵙⵖⵍ ⵓⴷⴷⵉⵙ ⴰⵏⴰⵎⵓⵏ ⵉ ⵚⴰⵃⴰ ⵏ ⵜⵎⵙⴰⵔⵉⵏ ⵏ ⵓⵙⵍⴻⵍⵍⵉ ⴷ ⵢⵉⵙⴽⵉⵍ.
ⴰⵣⵓⵍ ⴰⵎⵖⵏⴰⵙ ⵉ ⵎⴰⵕⵕⴰ ⵜⵉⵎⵖⴰⵔⵉⵏ ⵏ ⵓⵎⴰⴹⴰⵍ…ⵉ ⵎⴰⵕⵕⴰ ⵜⵉⵎⵖⴰⵔⵉⵏ ⵏ ⵍⵎⵖⵔⵉⴱ ⵙⴽⴰⵔⵏⵉⵏ ⵜⵓⴷⵔⵜ ⴷ ⵓⵏⴰⵔⵓⵣ ⴳ ⵎⴰⵕⵕⴰ ⴰⴷⵖⴰⵔ ⵏ ⵜⵎⵓⵔⵜ ⴰⴷ ⵉⵄⵣⵣⴰⵏ…ⴽⵓ ⴰⵙⴳⴳⵯⴰⵙ, ⴷ ⵜⵖⵉ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ ⴽⵉⴳⴰⵏ ⵏ ⵓⵎⵎⵉⵥⵏ ⴷ ⵉⵣⵔⴼⴰⵏ.
ⵕⵕⴱⴰⵟ, ⴳ 07 ⵎⴰⵕⵚ 2026